শিলচৰৰ পতিতালয়ত উদ্ধাৰ নেপালৰ সাতগৰাকী যুৱতী
সোমবাৰে শিলচৰ চহৰৰ ৰেড লাইট এলেকা (পতিতালয়)ৰ পৰা আৰক্ষীয়ে সাতগৰাকী নেপালী কিশোৰী আৰু যুৱতীক উদ্ধাৰ কৰে।
নেপালৰ এটা এন জি অ’ৰ সহায়ত সোমবাৰে সন্ধিয়া কাছাৰ আৰক্ষীয়ে উক্ত এলেকাত অভিযান চলাই যুৱতী কেইগৰাকীক উদ্ধাৰ কৰিবলৈ সক্ষম হয়।
উল্লেখ্য যে কিশোৰী আৰু যুৱতী কেইগৰাকী বন্দী হৈ থকাৰ কথা জানি দেওবাৰে নেপালৰ ‘শক্তি সমূহা’ নামৰ এন জি অ’ৰ এটা দল শিলচৰত উপস্থিত হৈছিল।
এই অভিযানৰ বিষয়ে জানিবলৈ দি এন জি অ’টোৰ বিষয়া দিলীপ কৈৰালাই কয়, ‘যোৱা ১৪ জুলাইত ইয়াৰ পৰাই এগৰাকী নেপালী যুৱতীক উদ্ধাৰ কৰিছিলো। আৰু সেই যুৱতী গৰাকীৰ তথ্য মতেই এই অভিযান চলোৱা হৈছে’।
‘যুৱতী আৰু কিশোৰী কেইগৰাকীক বলপূৰ্বকভাৱে দেহ ব্যৱসায়ত জড়িত কৰা এগৰাকী নেপালী মহিলাক গ্ৰেপ্তাৰ কৰা হৈছে। মহিলাগৰাকীৰ নাম লক্ষ্মী টামাং’, এই কথা জনায় কৈৰালাই।
কৈৰালাই লগতে কয় যে তেওঁলোকক বিভিন্ন প্ৰলোভন দি নাৰী সৰবৰাহকাৰীয়ে শিলচৰৰ পতিতালয়ত দেহ ব্যৱসায়ত জড়িত কৰিছিল।
স্থানীয়ভাৱে জনপ্ৰিয় তথা পৰিচিত ‘চৌধ নম্বৰ গলি’ৰ পৰা উদ্ধাৰ হোৱা যুৱতী আৰু কিশোৰী কেইগৰাকীক আজি শিলচৰৰ আদালতত হাজিৰ কৰোৱা হ’ব আৰু তাৰ পিছতে গৃহ ৰাজ্য নেপাললৈ লৈ যোৱাৰ সম্ভাৱনা আছে।
সম্প্ৰতি শিলচৰ আৰক্ষীৰ জিম্মাত আছে কিশোৰী আৰু যুৱতী কেইগৰাকী।