নেৰানেপেৰা বৰষুণৰ বাবে অৰুণাচল প্ৰদেশত হোৱা ভূমিস্খলত মাত্ৰ ৯ ঘণ্টাৰ ভিতৰতে সাত গৰাকী লোকে প্ৰাণ হেৰুৱাইছে।
শেহতীয়াভাৱে দুগৰাকী শিশুকে ধৰি তিনিগৰাকী লোকৰ ভূমিস্খলনৰ ফলত মোদিৰিজ’ অঞ্চলত মৃত্যু হৈছে। উদ্ধাৰকাৰী দলে চলাই থকা উদ্ধাৰ অভিযানত মাটৰ তলত আৰু চাৰি গৰাকী লোক আৱদ্ধ হৈ থকাৰ সন্দেহ প্ৰকাশ কৰিছে।
মৃত লোক কেইগৰাকী ক্ৰমে কামদাক কাগুং(৩০), কামদাক কৰ্না(৯) আৰু কামদাক জিতা (৮) বুলি চিনাক্ত কৰা হৈছে।
”ৰাষ্ট্ৰীয় ঘাইপথ ৪১৫ৰ সমীপতে থকা কামদাক তাও নামৰ ব্যক্তি গৰাকীৰ কেঁচা ঘৰটো আজি ৰাতিপুৱা ১১.৩০ মান বজাত ভূমিস্খলনে সম্পূৰ্ণৰূপে পুতি পেলোৱাৰ ফলতে ভায়বহ দুৰ্ঘটনাটো সংঘটিত হয়,” অৰুণাচলৰ এগৰাকী আৰক্ষী বিষয়াই এইদৰে জানিবলৈ দিয়ে।
ভূমিস্খলনৰ কবলত পৰা ঘৰটোৰ পৰা এজন কনমানি ল’ৰা আৰু এগৰাকী ছোৱালীৰ কথামপি প্ৰাণ ৰক্ষা পৰে যদিও ছোৱালীজনী আঘাতপ্ৰাপ্ত হয়।
ইটানগৰ আৰক্ষী আৰু এছ ডি আৰ এফৰ উদ্ধাৰকাৰী দলে বৰ্তমানো উদ্ধাৰ অভিযান অব্যাহত ৰাখিছে।
আজি পুৱতি নিশাৰ ভাগতো পাপুম পাৰে জিলাৰ তিগদো গাঁৱৰ এগৰাকী শিশুকে ধৰি চাৰি গৰাকী লোকৰ ভূমিস্খলনৰ ফলত মৃত্যু হৈছিল।