মহানগৰীত শুকুৰবাৰে মাজনিশা সংঘটিত হয় এক দলবদ্ধ আক্ৰমণৰ ঘটনা। ছয়মাইলত ৰাজপথৰে গৈ থকা অৱস্থাতে গাড়ী ৰখাই ৭ জনীয়া যুৱকৰ এটা দলে চোকা অস্ত্ৰৰে দুজন যুৱকক ঘপিয়ায়।
জানিব পৰা মতে, গাড়ীৰে পথ এৰি নিদিয়াক কেন্দ্ৰ কৰিয়েই কালি নিশাৰ এই ঘটনাটো সংঘটিত হয়।
ঘটনা বিবৰণী অনুসৰি গণেশগুৰিৰ পৰা ছয়মাইলৰ দিশে গৈ আছিল ৩খন গাড়ী। সন্মুখৰ গাড়ী দুখনৰে গৈ থকা ৭ জনীয়া যুৱকৰ দলটোৱে পিছে পিছে গৈ থকা গাড়ীখনক পথ এৰি দিয়া নাছিল।
সেই সময়তে ছাইড বিচাৰি হৰ্ণ বজাওঁতেই ৭ জনীয়া যুৱকৰ দলটোৱে গাড়ী ৰখাই পাছৰ বাহন খনত আহি থকা দুই যুৱকক আক্ৰমণ কৰে।
চোকা অস্ত্ৰৰে ইন’ভাখনত আহি থকা যুৱকক দুজনক আক্ৰমণ কৰাত দুয়োজন যুৱক আহত হয়। আহত যুৱক দুজনৰ নাম কৃষ্ণ শৰ্মা আৰু মহিবুল ইছলাম।
আনহাতে, উক্ত সময়তে একাংশ প্ৰত্যক্ষদৰ্শীয়ে খৱৰ দিয়াত ঘটনাস্থলীত দিচপুৰ আৰক্ষী আহি উপস্থিত হয়। ঘটনাস্থলীত উপস্থিত হৈ আৰক্ষীয়ে আক্ৰমণকাৰী ৭ যুৱকৰ মাজৰ ৫ জনক আটক কৰে।
আটকাধীন যুৱককেইজন হৈছে ক্ৰমে ঋষিৰাজ চেতিয়া, দীপক সিং, অভিষেক নায়ক, বিচান মুখাৰ্জী আৰু ৰাহুল দিকজ। ইয়াৰে বিচান মুখাজীৰ ঘৰ কলকাতাত বুলি জানিব পৰা গৈছে।
ইপিনে, ঘটনা সংঘটিত কৰাৰ পাছতে ঘটনাস্থলীৰ পৰা আন দুজন যুৱকে পলায়ন কৰে। আক্ৰমণকাৰী যুৱককেইজন Oraval travels pvt ltd ত কৰ্মৰত।
আৰক্ষীয়ে ইতিমধ্যে যুৱককেইজনে ব্যৱহাৰ কৰা দুয়োখন গাড়ী জব্দ কৰিছে। দিচপুৰ আৰক্ষীয়ে নিশা প্ৰায় ৩ মান বজাত ঘটনাটো সংঘটিত হোৱা বুলি জানিবলৈ দিয়ে।দুয়োপক্ষৰ ফালৰ পৰা দিচপুৰ আৰক্ষী থানাত এজাহাৰ দাখিল কৰা বুলি আৰক্ষীয়ে জানিবলৈ দিছে।