অসমৰ মুখ্যমন্ত্ৰী তথা NEDA (North-East Democratic Alliance)ৰ আহ্বায়ক ড° হিমন্ত বিশ্ব শৰ্মাৰ বাবে এইবাৰ এক মোক্ষম আঘাত। জ্বৰে এৰিলেও যেন কপটীয়েনো নেৰিছে মুখ্যমন্ত্ৰী শৰ্মাক। NEDAৰ অন্যতম সহযোগী, এন পি পি (NPP)ৰ মুৰব্বী তথা মেঘালয়ৰ মুখ্যমন্ত্ৰী কনৰাড চাংমাই NEDAৰ পৰা আঁতৰি মিত্ৰজোঁটটোক প্ৰত্যাহ্বান জনাইছে।
মঙলবাৰে দিল্লীত কনৰাড চাংমাই আন সহযোগী দলসমূহৰ সৈতে উত্তৰ-পূবৰ বাবে এক নতুন আঞ্চলিক ৰাজনৈতিক মঞ্চ ঘোষণা কৰে। এন পি পিৰ মুৰব্বী কনৰাড চাংমা, টিপ্ৰা মোথাৰ প্ৰদ্যুৎ মাণিক্য, আৰু বিজেপিৰ প্ৰাক্তন মুখপাত্ৰ এম. কিকনে মঙলবাৰে এই নতুন ৰাজনৈতিক সত্তাৰ কথা ঘোষণা কৰে।
সংবাদ মাধ্যমক সম্বোধন কৰি মেঘালয়ৰ মুখ্যমন্ত্ৰীগৰাকীয়ে কয়, “আমি উত্তৰ-পূবৰ বাবে এটা সুকীয়া ৰাজনৈতিক সত্তাৰ অধীনত একেলগে কাম কৰাৰ সিদ্ধান্ত লৈছো। আমি এটা কমিটী গঠন কৰিছো, যিয়ে অহা ৪৫ দিনৰ ভিতৰত প্ৰতিবেদন দাখিল কৰিব। অন্য ৰাজনৈতিক দলৰ সৈতে যোগাযোগ কৰিবলৈ কমিটীখনক দায়িত্ব দিয়া হৈছে।”
তেওঁ লগতে কয় যে খিলঞ্জীয়া লোকৰ ভূমিৰ অধিকাৰ সুৰক্ষিত কৰাটো এই মঞ্চৰ এক প্ৰাথমিক চিন্তা। এই চিন্তাকে সাৰোগত কৰি উত্তৰ-পূবৰ আঞ্চলিক দলসমূহ একত্ৰিত হৈ সঠিক সময়ত এক শক্তিশালী ৰাজনৈতিক সত্তা হিচাপে আত্মপ্ৰকাশ কৰিবলৈ আগবাঢ়িছে।
ইপিনে, টিপ্ৰা মোথাৰ প্ৰধান প্ৰদ্যুৎ মাণিক্যই কয়, “আমি আমাৰ জনসাধাৰণৰ হৈ দৃঢ়তা আৰু সত্যতাৰে থিয় দিব বিচাৰো। আমাৰ দৃষ্টিভংগী বেলেগ হ‘ব পাৰে, কিন্তু আমাৰ মাজত কোনো বিভেদ আৰু দ্বন্দ্ব নাই। ইয়াৰ পূৰ্বেও এটা মঞ্চ সৃষ্টিৰ প্ৰচেষ্টা কৰা হৈছিল। আমি ইয়াত কাৰো সৈতে যুঁজ দিবলৈ নহয়, আমাৰ জনসাধাৰণৰ অধিকাৰৰ বাবে যুঁজিবলৈহে আত্মপ্ৰকাশ কৰিছো।”
সংবাদমেল সম্বোধন কৰাৰ লগতে নতুন ৰাজনৈতিক মঞ্চৰ আহ্বায়কসকলে এই সন্দৰ্ভত এক বিবৃতিও প্ৰকাশ কৰিছে। উল্লেখযোগ্য যে এন পি পি আৰু টিপ্ৰা মোথা দুয়োটা ৰাজনৈতিক দলেই বিজেপি নেতৃত্বাধীন এন ডি এ (NDA) ৰ সহযোগী দল। উত্তৰ-পূবৰ এই দুই নেতাই দিল্লীত অসমৰ মুখ্যমন্ত্ৰী ড° হিমন্ত বিশ্ব শৰ্মাই নেতৃত্ব দিয়া NEDAৰ বিপৰীতে নতুন ৰাজনৈতিক শক্তি ঘোষণা কৰাটোৱে অঞ্চলটোৰ ৰাজনীতিত এক বিশেষ তাৎপৰ্য বহন কৰিছে। এই নতুন মঞ্চৰ সৈতে অসমৰ ডিমাসা নেতা ডিনিয়েল লাংথাছাৰ দল পিপলছ পাৰ্টি ডিমা হাছাওও চামিল হৈছে।
