আমেৰিকা যুক্তৰাষ্ট্ৰৰ নিউয়ৰ্কৰ ব্ৰুকলিন চহৰৰ এটা চাবৱে ষ্টেচনত আজি অজ্ঞাত আততায়ীৰ নিৰ্বিচাৰ গুলীচালনাত কেইবাজনো লোক আহত হয় গুলীয়াই হত্যা কৰা হৈছিল।
স্থানীয় সংবাদ মাধ্যমৰ প্ৰতিবেদন অনুসৰি অজ্ঞাত বন্দুকধাৰীজন এতিয়াও অঞ্চলটোত সক্ৰিয় আছে বুলি সন্দেহ কৰা হৈছে।
স্থানীয় সময় অনুসৰি পুৱা ৮:৩০ বজাত এই ভয়াবহ আক্ৰমণ সংঘটিত হৈছিল। স্থানীয় সংবাদ মাধ্যমৰ খবৰ অনুসৰি আক্ৰমণৰ পিছতে ৰে’লৰ চলাচল বন্ধ কৰি দিয়া হয়।
নিউয়ৰ্ক আৰক্ষী বিভাগে বিশেষ অনুসন্ধানৰ বাবে ব্ৰুকলিনৰ কিছু নিৰ্দিষ্ট স্থানত সাধাৰণ নাগৰিকৰ প্ৰৱেশত বাধা আৰোপ কৰিছে। ইতিমধ্যে আৰক্ষীয়ে দুৰ্বৃত্তৰ সন্ধানত অনুসন্ধান আৰম্ভ কৰিছে।
অৱশ্যে এই আক্ৰমণৰ আঁৰত কোনো সন্ত্ৰাসবাদী কাৰ্যকলাপ জড়িত আছে নেকি এই বিষয়ে নিশ্চিত তথ্য স্থানীয় কৰ্তৃপক্ষই লাভ কৰা নাই বুলি জানিবলৈ দিছে।
উল্লেখ্য যে সোমবাৰে আমেৰিকা যুক্তৰাষ্ট্ৰৰ ৰাষ্ট্ৰপতি জো বিডেনে বন্দুক নিয়ন্ত্ৰণৰ নতুন ব্যৱস্থা ঘোষণা কৰিছিল। এই ঘোষণাৰ এদিন পিছতে সংঘটিত এই নৃশংস ঘটনাই চাঞ্চল্যৰ সৃষ্টি কৰিছে।
