দিল্লীৰ জৱাহৰলাল নেহৰু বিশ্ববিদ্যালয়ত (জে এন ইউ) পুনৰ অশান্তি। বুধবাৰে নিশা জে এন ইউত চলি আছিল সমাজ বিজ্ঞান বিদ্যালয়ৰ ছাত্ৰ সভা। তাতে বাওঁপন্থী এআইএছএৰ সৈতে জড়িত ছাত্ৰ-ছাত্ৰী আৰু অখিল ভাৰতীয় বিদ্যাৰ্থী পৰিষদৰ কৰ্মীৰ মাজত সংঘৰ্ষৰ ফলত কেম্পাছত উত্তেজনা সৃষ্টি হয়।
এই সংঘৰ্ষত কেইবাজনো ছাত্ৰ আহত হয়। গোটেই নিশা উত্তেজনাপূৰ্ণ পৰিস্থিতিৰ পিছত বৃহস্পতিবাৰে পুৱালৈকে কেম্পাছৰ পৰিস্থিতি উত্তেজনাপূৰ্ণ হৈয়ে থাকে।
সূত্ৰ অনুসৰি, এই ঘটনা সংঘটিত হৈছে বিশ্ববিদ্যালয়খনৰ সমাজ বিজ্ঞান বিদ্যালয় ভৱনত। তাতে নৱেম্বৰৰ প্রথম সপ্তাহত অনুষ্ঠিত হ’বলগীয়া ছাত্র সন্থাৰ নির্বাচনৰ বাবে এখন নির্বাচন আয়োগ গঠনৰ সন্দর্ভত আলোচনা চলি আছিল৷ একেখন বৈঠকতে সোঁপন্থী ছাত্ৰ সংগঠন অখিল ভাৰতীয় বিদ্যাৰ্থী পৰিষদে আঞ্চলিক প্ৰেক্ষাপটৰ আধাৰত উত্তৰ প্ৰদেশ আৰু বিহাৰৰ ছাত্ৰ-ছাত্ৰীক লক্ষ্য কৰি এগৰাকী বাওঁপন্থী কাউন্সিলৰে ‘আপত্তিজনক আৰু অপমানজনক’ মন্তব্য কৰাৰ অভিযোগ উত্থাপন কৰে।
এবিভিপিৰ সমাজ বিজ্ঞান বিদ্যালয়ৰ কাউন্সিলাৰ অভিষেক ৰায়ৰ দাবী, ‘সভাত এটা প্ৰতিবেদন পাঠ কৰা হৈছিল। সেই মুহূৰ্তত বাওঁপন্থী কাউন্সিলাৰ এজনে কয়, ‘উত্তৰ প্ৰদেশ আৰু বিহাৰৰ পৰা অহা সকল জেএনইউত থকাৰ যোগ্য নহয়। সিহঁতে আন ঠাইলৈ যাব লাগে।’
এই মন্তব্যই বৈঠকত এক বৃহৎ হুলস্থুলৰ সৃষ্টি কৰে। উপস্থিত ছাত্ৰ-ছাত্ৰীসকলে ক্ষমা বিচাৰিলে। কিন্তু যেতিয়া এই মন্তব্য কৰা কাউন্সিলাৰ আৰু সভাৰ অধ্যক্ষ দুয়োজনেই নাকচ কৰিলে, তেতিয়া কাজিয়া আৰম্ভ হয়।
তেওঁ আৰু অভিযোগ কৰে যে, ‘বাওঁপন্থী ছাত্ৰ-ছাত্ৰীসকলে আমাৰ ছাত্ৰ-ছাত্ৰীসকলৰ ওপৰত চকী দলিয়াইছিল, লাঠিৰে আক্ৰমণ কৰিছিল। কেইবাজনো ছাত্ৰ-ছাত্ৰীৰ মূৰ আৰু পিঠিত গুৰুতৰভাৱে আঘাতপ্ৰাপ্ত হয়।’
আনহাতে, এই ঘটনাৰ প্ৰতি সঁহাৰি জনাই ভাৰতীয় ছাত্ৰ ফেডাৰেচন আৰু সৰ্বভাৰতীয় ছাত্ৰ সন্থাই এবিভিপিক ‘গণতান্ত্ৰিক প্ৰক্ৰিয়াত ব্যাঘাত জন্মোৱা’ আৰু বাওঁপন্থী কৰ্মীক ‘শাৰীৰিক আক্ৰমণ’ কৰাৰ অভিযোগ উত্থাপন কৰিছে। এছ এফ আইৰ এজন নেতাই অভিযোগ কৰে যে, ‘এবিভিপিয়ে নিজৰ লক্ষ্যত উপনীত হ’ব নোৱাৰাৰ বাবে বৈঠকৰ সময়ত হিংসাৰ আশ্ৰয় লৈছিল। এজন ছাত্ৰকে ধৰি আমাৰ কেইবাজনো সদস্য আহত হয়।’
কিন্তু এবিভিপিয়ে এই দাবীৰ প্ৰতিহত কৰি কয় যে, ‘বাওঁপন্থী সদস্যসকলে গালি-গালাজ আৰু আঞ্চলিক অপবাদ অনাৰ পিছত সংঘৰ্ষৰ সূচনা হয়। আমি হিংসাক গৰিহণা দিছো যদিও এনে আচৰণ সহ্য নকৰো।’
বিশ্ববিদ্যালয়ৰ সূত্ৰ অনুসৰি এই সংঘৰ্ষত দুয়োপক্ষৰ ছাত্ৰ-ছাত্ৰী আহত হয়। পৰিস্থিতি নিয়ন্ত্ৰণ কৰিবলৈ আৰক্ষীয়ে কেম্পাছত উপস্থিত হৈ গোটেই নিশাটো সতৰ্কতা অৱলম্বন কৰে। অৱশ্যে এতিয়ালৈকে কোনো পক্ষই লিখিত অভিযোগ দাখিল কৰা নাই বুলি প্ৰশাসনে জানিবলৈ দিয়ে।
বৃহস্পতিবাৰে পুৱালৈকে কেম্পাছত আৰক্ষীৰ নিৰীক্ষণ অব্যাহত ৰখা হয়। বিশ্ববিদ্যালয় কৰ্তৃপক্ষই এই সন্দৰ্ভত তদন্ত আৰম্ভ কৰা বুলি জানিবলৈ দিয়ে। প্ৰয়োজন হ’লে দুয়োপক্ষৰ পৰা বক্তব্য পোৱাৰ পিছত অনুশাসনমূলক ব্যৱস্থা গ্ৰহণ কৰা হ’ব।
উল্লেখ্য যে নৱেম্বৰৰ প্ৰথম সপ্তাহত জেএনইউৰ ছাত্ৰ সন্থাৰ নিৰ্বাচন। আৰু সেই নির্বাচন উপলক্ষে নির্বাচন আয়োগ গঠনৰ বৈঠকৰ সময়ত সংঘটিত হৈছিল এই উত্তেজিত ঘটনা৷ যদিও জেএনইউত বাওঁপন্থী ছাত্ৰ সংগঠনৰ প্ৰভাৱ সদায় আছে, এবিভিপিয়েও শেহতীয়া বছৰবোৰত এক শক্তিশালী প্ৰতিদ্বন্দ্বী হিচাপে আত্মপ্ৰকাশ কৰিছে। ৰাজনৈতিক বিশ্লেষকসকলৰ মতে নিৰ্বাচনৰ পূৰ্বে এনে সংঘৰ্ষৰ ফলত পৰিস্থিতি আৰু অধিক উত্তপ্ত হ’ব পাৰে।
