ৰাজ্যৰ চৰকাৰী শিক্ষা ব্যৱস্থাক লৈ গভীৰ উদ্বেগ প্ৰকাশ কৰিছে ভাৰতৰ ছাত্ৰ ফেডাৰেচন (SFI), অসম ৰাজ্যিক কমিটিয়ে। এক বিবৃতিত সংগঠনটোৱে অভিযোগ কৰিছে যে বিজেপি নেতৃত্বাধীন চৰকাৰে শিক্ষকসকলক বিভিন্ন পাঠ্যক্ৰম বহিৰ্ভূত কামত নিয়োজিত কৰি জনসাধাৰণৰ শিক্ষাৰ অধিকাৰ খৰ্ব কৰাৰ এক ষড়যন্ত্ৰ চলাইছে। এছ এফ আইৰ মতে, এই নীতিয়ে ৰাজহুৱা শিক্ষা ব্যৱস্থাক ধ্বংসৰ দিশলৈ ঠেলি দিছে।
সংগঠনটোৱে লক্ষ্য কৰিছে যে প্ৰশিক্ষণৰ নামত শিক্ষকসকলক দীৰ্ঘদিন ধৰি শ্ৰেণীকক্ষৰ পৰা আঁতৰাই ৰখা হৈছে। ইয়াৰ উপৰি ভোটাৰ তালিকা সংশোধন, খেল-মহাৰণ, চৰকাৰী উৎসৱ, বীমা আদি কাৰ্যসূচীত শিক্ষকসকলক ব্যস্ত কৰি ৰখাৰ ফলত হাজাৰ হাজাৰ বিদ্যালয়ত পাঠদান সম্পূৰ্ণৰূপে ব্যাহত হৈছে। এছ এফ আইৰ মতে, ইতিমধ্যে ৰাজ্যত ১০ হাজাৰৰো অধিক চৰকাৰী বিদ্যালয় বন্ধ হৈছে আৰু বহু বিদ্যালয় বৰ্তমান শিক্ষক-শূন্য অৱস্থাত চলি আছে।
এছ এফ আইৰ অভিযোগ অনুসৰি, চৰকাৰে ইচ্ছাকৃতভাৱে চৰকাৰী বিদ্যালয়সমূহ দুৰ্বল কৰি শিক্ষাৰ বাণিজ্যিকীকৰণ আৰু বেচৰকাৰীকৰণৰ পথ প্ৰশস্ত কৰিছে। দুখীয়া আৰু শ্ৰমজীৱী পৰিয়ালৰ সন্তানসকলক শিক্ষাৰ মৌলিক অধিকাৰৰ পৰা বঞ্চিত কৰাৰ লক্ষ্যৰে চৰকাৰে এনে দায়িত্বহীন নীতি গ্ৰহণ কৰিছে বুলি সংগঠনটোৱে দাবী কৰে।
ৰাজ্যৰ শিক্ষা ব্যৱস্থাৰ সুৰক্ষাৰ স্বাৰ্থত সংগঠনটোৱে চৰকাৰৰ ওচৰত কেইবাটাও গুৰুত্বপূৰ্ণ দাবী উত্থাপন কৰিছে:
- অবিলম্বে শিক্ষকসকলক সকলো ধৰণৰ পাঠ্যক্ৰম বহিৰ্ভূত কামৰ পৰা মুক্ত কৰিব লাগে।
- প্ৰতিখন বিদ্যালয়ত পৰ্যাপ্ত শিক্ষকৰ নিযুক্তি নিশ্চিত কৰিব লাগে।
- শিক্ষাৰ নামত চলি থকা বাণিজ্যিকীকৰণ আৰু বেচৰকাৰীকৰণৰ প্ৰক্ৰিয়া বন্ধ কৰিব লাগে।
ভাৰতৰ ছাত্ৰ ফেডাৰেচন, অসম ৰাজ্যিক কমিটিয়ে চৰকাৰক সকীয়াই দিছে যে যদিহে ছাত্ৰ-ছাত্ৰীৰ শৈক্ষিক ভৱিষ্যতৰ প্ৰতি লক্ষ্য ৰাখি তেওঁলোকৰ এই যুক্তিসংগত দাবীসমূহ মানি লোৱা নহয়, তেন্তে সমগ্ৰ ৰাজ্যজুৰি এক তীব্ৰ গণ আন্দোলন গঢ়ি তোলা হ’ব। সংগঠনটোৱে দৃঢ়তাৰে মত পোষণ কৰিছে যে ভৱিষ্যৎ প্ৰজন্মৰ শিক্ষাৰ অধিকাৰ সুৰক্ষিত কৰাটো বৰ্তমানৰ সময়ত এক অপৰিহাৰ্য আৰু জৰুৰী বিষয়।
