পুত্ৰ আৰিয়ান খান ড্ৰাগছৰ গোচৰত গ্ৰেপ্তাৰ হোৱাৰ পাছৰ পৰাই দেশত চৰ্চিত হৈ আছে শ্বাহৰুখ খান। বলিউদৰ বাদশ্বাহ গৰাকীয়ে পুনৰ দখল কৰিছে চৰ্চাৰ শিৰোনাম। পিছে এইবাৰ পুত্ৰ আৰিয়ান খানৰ বাবে নহয়, ইণ্টাৰনেটত ভাইৰেল হোৱা এটা ভিডিওৰ বাবেহে।
উৎসৱৰ বতৰত শীৰ্ষস্থানীয় ব্ৰেণ্ডবোৰে তেওঁলোকৰ উৎসৱ-নিৰ্দিষ্ট সামগ্ৰীবোৰ সম্পূৰ্ণ উৎসাহেৰে প্ৰচাৰ কৰাৰ সময় আহি পৰে। জনগণক আকৃষ্ট কৰিবলৈ বিভিন্ন মনোৰঞ্জনদায়ক বিজ্ঞাপনেৰে চমক সৃষ্টি কৰে ব্ৰেণ্ডসমূহে।
কেডবেৰী হৈছে এক ব্ৰেণ্ড যি প্ৰায়ে বিশেষ অনুষ্ঠান আৰু উৎসৱৰ সময়ত চিন্তা-উদ্দীপক আৰু মননশীল বিজ্ঞাপনেৰে মানুহক আকৃষ্ট কৰে। এইবাৰো তাৰ ব্যতিক্ৰম নহয়।
এইবাৰৰ দেৱালীত কোম্পানীটোৱে শ্বাহৰুখ খানক কৰ’ণা মহামাৰীৰ ফলত ক্ষতিগ্ৰস্ত হোৱা ক্ষুদ্ৰ আৰু স্থানীয় ব্যৱসায়ৰ ব্ৰেণ্ড এম্বেচেডৰ হিচাপে দেখুওৱা এটা বিজ্ঞাপন প্ৰচাৰ কৰিছে। ইণ্টাৰনেটত এই পদক্ষেপক বহুলোকে প্ৰশংসা কৰিছে।
‘কেৱল কেডবেৰী বিজ্ঞাপন নহয়’ শীৰ্ষক বিজ্ঞাপনটো স্থানীয় ব্যৱসায়ীসকলৰ এটা ভাষ্যৰে আৰম্ভ হৈছে আৰু দৰ্শকসকলক মহামাৰীৰ ফলত তেওঁলোক কিমান বেয়াকৈ প্ৰভাৱিত হৈছিল সেই বিষয়ে জনায়।
ভিডিওটোত কোৱা হৈছে, “এই দেৱালীত, আমি ভাৰতৰ আটাইতকৈ ডাঙৰ ব্ৰেণ্ড এম্বেচেডৰক তেওঁলোকৰ ব্ৰেণ্ড এম্বেচেডৰ কৰি শ শ ক্ষুদ্ৰ ব্যৱসায়ক সহায় কৰিব বিচাৰিছো।”
বিজ্ঞাপনটোত অভিনয় কৰা শ্বাহৰুখ খানে বিভিন্ন দোকানৰ নাম লৈ দৰ্শকসকলক তেওঁলোকৰ পৰা কাপোৰ, জোতা, মিঠাই তথা বিভিন্ন সামগ্ৰী কিনিবলৈ আহ্বান জনায়।
ব্ৰেণ্ডটোৱে বিজ্ঞাপনটোৰ জৰিয়তে জনাইছিল যে তেওঁলোকে বিজ্ঞাপনটোত স্থানীয় দোকানৰ নাম ল’বলৈ শ্বাহৰুখ খানৰ মুখ আৰু কণ্ঠস্বৰ পুনৰ সৃষ্টি কৰিবলৈ মেচিন লাৰ্ণিং ব্যৱহাৰ কৰিছিল।
“সকলো দোকানৰ নাম প্ৰকাশ কৰাটো অসম্ভৱ, সেয়েহে আমি স্থানীয় ব্যৱসায়ী সকলক তেওঁলোকৰ ‘নট জাষ্ট এ কেডবেৰী এড’ৰ নিজা সংস্কৰণ সৃষ্টি কৰাৰ ক্ষমতা দিছো।”- ভিডিওটোত এইদৰে কোৱা হৈছে।
ভিডিঅ’টোৰ শেষৰ ফালে শ্বাহৰুখ খানে কয়, “আমাৰ চাৰিওফালে থকা সৰু সৰু দোকানবোৰৰো এই দেৱালীত সুখী হোৱাৰ থল আছে।”
ইউটিউবত আপলোড কৰাৰ পিছত বিজ্ঞাপনটো ভাইৰেল হৈ পৰে। ব্ৰেণ্ডটোৰ চিন্তাশীল পদক্ষেপে দৰ্শকক মোহিত কৰে আৰু তেওঁলোকে ক্ষুদ্ৰ ব্যৱসায়ৰ প্ৰচাৰৰ বাবে কোম্পানীটোৰ প্ৰচেষ্টাক প্ৰশংসাৰে উপচাই পেলাইছে।