যোৱা তিনিদিন ধৰি বলিউদৰ মেগাষ্টাৰ অমিতাভ বচ্চন মুম্বাইৰ নানাৱতি চিকিৎসালয়ত চিকিৎসাধীন হৈ আছে। অভিনেতা গৰাকীৰ স্বাস্থ্যৰ অৱনতি ঘটাত যোৱা মঙলবাৰে পুৱতি নিশা ৩ বজাত চিকিৎসালয়ত ভৰ্তি কৰায়।
জানিব পৰা মতে লিভাৰৰ অসুস্থতাৰ বাবে হঠাৎ এইদৰে অভিনেতা গৰাকীক চিকিৎসালয়ত ভৰ্তি কৰিব লগীয়া হয়। মেগাষ্টাৰ গৰাকী এইদৰে চিকিৎসাধীন হৈ থকা কথাটো প্ৰথমে সম্পূৰ্ণৰূপে গোপনে ৰখা হৈছিল যদিও বৃহস্পতিবাৰে বিয়লিহে কিছু লোকে জানিব পাৰে।
ইফালে চিকিৎসালয় কৰ্তৃপক্ষই বিশেষভাৱে চিকিৎসা প্ৰদান কৰি থকা বিগ বি বচ্চনক পৰিয়ালৰ লোকক বাদ দি অন্য কোনো লোককে সাক্ষাৎ কৰিবলৈ দিয়া নাই।
এটা সূত্ৰৰ পৰা জানিব পৰা অনুসৰি অভিনেতা গৰাকীক অহা দেওবাৰে চিকিৎসালয়ৰ পৰা ঘৰলৈ যাব দিব।
লগতে পঠক : ৭৫ শতাংশ বেয়া হৈছে মেগাষ্টাৰ অমিতাভ বচ্চনৰ লিভাৰ
সদাই সুস্থ আৰু সক্ৰিয় ৰূপত দেখি থকা সকলোৰে আপোন অমিতাভ বচ্চনৰ লিভাৰ ৭৫ শতাংশ বেয়া। কিছু দিনৰ পূৰ্বে এটা অনুষ্ঠানৰ জৰিয়তে এই কথা ‘বিগ বি’য়ে নিজে ৰাজহুৱা কৰিছিল। আৰু সেয়ে মাজে মাজে লিভাৰৰ অসুস্থতাৰ বাবে চিকিৎসাধীন হ’ব লগীয়া হয় অভিনেতা গৰাকী।
উল্লেখ্য যে মাত্ৰ ২৫ শতাংশ সক্ৰিয় হৈ থকা লিভাৰৰ সহায়ত জীয়াই থকা বলিউদৰ মেগাষ্টাৰ অমিতাভ বচ্চনৰ জনপ্ৰিয় ৰিয়েলিটি শ্ব’ ‘কৌন বনেগা কড়োৰপতি’ ছনি টিভিৰ জৰিয়তে সম্প্ৰচাৰ হৈ থকাৰ লগতে শীঘ্ৰে মুক্তি পাব ‘ব্ৰহ্মাস্ত্ৰ’ নামৰ এখন বিগ বাজেটৰ হিন্দী ছবি।
