অপ্ৰতিৰোধ্য বাংলাদেশী চাকিব : অদমনীয় প্ৰদৰ্শনেৰে বিশ্বকাপত ৰচিলে অনন্য অভিলেখ
ইংলেণ্ডত চলি থকা বিশ্বকাপ ক্ৰিকেট প্ৰতিযোগিতাত দমনীয় প্ৰদৰ্শনেৰে ক্ৰিকেট প্ৰেমী তথা বিশেষজ্ঞসকলৰ আকৰ্ষণৰ কেন্দ্ৰ বিন্দু হৈ পৰিছে বাংলাদেশৰ ষ্টাৰ অলৰাউণ্ডাৰ চাকিব আল হাছান। নিজৰ ক্ৰিকেট কেৰিয়াৰৰ সৰ্বোচ্চ ফৰ্মত থকা চাকিবে এইবাৰৰ বিশ্বকাপত গঢ়িবলৈ সক্ষম হৈছে এক অনবদ্য ৰেকৰ্ড।
চলিত বিশ্বকাপৰ এখন গুৰুত্বপূৰ্ণ লীগ মেচত আজি বাংলাদেশে মুখামুখি হৈছে আফগানিস্তানৰ বিৰুদ্ধে। আৰু এই মেচখনত ৩৫ ৰান কৰাৰ লগে লগে চাকিবে বিশ্বকাপ ক্ৰিকেট টুৰ্ণামেণ্টত ১০০০ ৰান সম্পূৰ্ণ কৰি বাংলাদেশ ক্ৰিকেটত এক ইতিহাস সৃষ্টি কৰে। এই অনন্য অভিলেখৰ অধিকাৰী হোৱা বাওঁহতীয়া বেটছমেন গৰাকীয়ে হৈছে বাংলাদেশৰ একমাত্ৰ ক্ৰিকেটাৰ।
উল্লেখ্য যে চলিত বিশ্বকাপত এই পৰ্যন্ত চাকিবে দুটা বিস্ফোৰক শতকীয় ইনিংছো খেলিছে। বিশ্বকাপত হাজাৰ ৰান সম্পূৰ্ণ কৰা এই ৰেকৰ্ড গঢ়া চাকিব হৈছে বিশ্বৰ ১৯ সংখ্যক বেটছমেন। ইয়াৰ উপৰি তিনিটা অৰ্ধশতকীয় ইনিংছেৰেও দলত গুৰুত্বপূৰ্ণ অৰিহনা আগবঢ়াইছে।
বিশ্বকাপৰ এই পৰ্যন্ত ছয়খন মেচত চাকিবে ৪৭৬ ৰান সংগ্ৰহ কৰিছে। ৩২ বছৰীয়া ষ্টাৰ অল ৰাউণ্ডাৰ গৰাকীয়ে ঘৰুৱা দল ইংলেণ্ডৰ বিৰুদ্ধে ১২১ ৰান আৰু ৱেষ্ট ইণ্ডিজৰ বিপক্ষে ১২৪ ৰানৰ বিস্ফোৰক অপৰাজিত শতকীয় ইনিংছেৰে বিজয় লক্ষ্যত উপনীত কৰাইছিল।
চাকিবৰ এই দমনীয় প্ৰদৰ্শনৰ বাবেই প্ৰতিযোগিতাৰ ছেমি ফাইনেলত প্ৰৱেশৰ আশা এতিয়াও সজীৱ হৈ আছে বাংলাদেশৰ।