কৰোনা ভাইৰাছ সংক্ৰমণ ৰোধ কৰিবলৈ চৰকাৰে ধাৰ্য কৰা নীতি-নিৰ্দেশনা কঠোৰভাৱে বলবৎ কৰিবলৈ বদ্ধপৰিকৰ বুলি ঘোষণা কৰি আহিছে অসম আৰক্ষীৰ সঞ্চালক প্ৰধান ভাস্কৰজ্যোতি মহন্তই ।
কিন্তু অতি পৰিতাপৰ বিষয় যে বৰ্তমান শিৱসাগৰত স্বয়ং আৰক্ষীয়েই ভংগ কৰিছে কভিড প্ৰ’টকল।
শিৱসাগৰ সদৰ থানাৰ গীতাৰ্থ চৌধুৰী নামৰ উপ পৰিদৰ্শক গৰাকীয়ে চূড়ান্ত মইমতালি প্ৰদৰ্শন কৰি ফালিলে প্ৰশাসনে আঁৰি থোৱা ‘কন্টেইনমেন্ট জ’ন’ৰ বেনাৰ।
৩০ মে’ত আৰক্ষী উপ পৰিদৰ্শক গৰাকীৰ পত্নী জয়শ্ৰী দাস ক’ভিড পজিটিভ হৈছিল। ইয়াৰ পিছতে উপ পৰিদৰ্শক গৰাকী থকা ভাড়া ঘৰটোত কন্টেইনমেন্ট জ’ন হিচাপে ঘোষণা কৰি প্ৰশাসনে আঁৰি দিছিল নিদিষ্ট বেনাৰ।
১৩ জুনলৈকে ভাড়াঘৰটোৰ বাসিন্দাসকল চৌহদৰ পৰা ওলাই যোৱাত বাধা নিষেধ আৰোপ কৰিছিল যদিও একমাত্ৰ আৰক্ষী হোৱাৰ সুবাদতে বেনাৰ চিৰাচিৰকৈ ফালি শুকুৰবাৰেই (১১জুন) বাহিৰলৈ কামত ওলাই যায় গীতাৰ্থ চৌধুৰী আৰু তেওঁৰ পত্নী।
ভাড়াঘৰটোতথকা বাকী ৭ গৰাকী ব্যক্তিয়ে ক’ভিড প্ৰ’টকল মানি বৰ্তমানেও আবদ্ধ হৈ আছে। অথচ নীতি নিৰ্দেশনা ৰক্ষাৰ দায়িত্বত থকা আৰক্ষীয়েই ক’ভিড প্ৰ’টকল ভৰিৰে মোহাৰি ওলাই যোৱাত তীব্ৰ প্ৰতিক্ৰিয়া সৃষ্টি হৈছে চহৰখনত।
আৰক্ষীয়েই যদি প্ৰ’টকল ভংগ কৰে সাধাৰণ জনতাক কিদৰে বুজাব বুলিও প্ৰশ্ন উত্থাপন কৰিছে ৰাইজে। লগতে শীঘ্ৰেই বিহিত ব্যৱস্থা গ্ৰহণৰ বাবে প্ৰশাসনৰ প্ৰতি দাবী জনাইছে স্থানীয় বাসিন্দা সকলে।
উল্লেখযোগ্য যে বিগত বৰ্ষটো আৰক্ষী উপ পৰিদৰ্শকগৰাকীয়ে উলংঘা কৰিছিল কভিড প্ৰ’টকল।
