এছিয়ান বক্সিং চেম্পিয়নশ্বিপত ব্ৰঞ্জৰ পদক দখল শিৱ থাপাৰ
বেংককত চলি থকা এছিয়ান বক্সিং চেম্পিয়নশ্বিপত চমকপ্ৰদ প্ৰদৰ্শন দাঙি ধৰি ব্ৰঞ্জৰ পদক দখল কৰে অসমৰ তাৰকা বক্সাৰ শিৱ থাপাই। আজি অনুষ্ঠিত প্ৰতিযোগিতাখনৰ ছেমিফাইনেলত শিৱই দুৰ্দান্ত প্ৰদৰ্শন আগবঢ়ালেও কাজাখাস্তানৰ জাকিৰ ছেফিউলিনৰ হাতত পৰাস্ত হয়।
প্ৰতিযোগিতাখনত ৬০ কেজি শাখাত প্ৰতিদ্বন্দ্বিতা কৰা শিৱ থাপাই ছেমি ফাইনেললৈ পথ প্ৰশস্ত কৰাৰ যাত্ৰাত দক্ষিণ কোৰিয়া, কিৰঘিস্তান আৰু থাইলেণ্ডৰ বক্সাৰক পৰাস্ত কৰিছিল।
উল্লেখযোগ্য যে, ২০১৩ চনত এছিয়ান বক্সিং চেম্পিয়নশ্বিপত সোণৰ পদক লাভ কৰিছিল অসমৰ প্ৰতিভাবান বক্সাৰগৰাকীয়ে। ২০১৩ চনৰ উপৰি শিৱই ২০১৫ চনত ব্ৰঞ্জ আৰু ২০১৭ চনত ৰূপৰ পদক দখল কৰিবলৈ সক্ষম হৈছিল এছিয়াৰ সন্মানীয় প্ৰতিযোগিতাখনত।
চলিত প্ৰতিযোগিতাখনত ব্ৰঞ্জৰ পদক দখল কৰাৰ লগে লগে প্ৰতিযোগিতাখনত শিৱৰ মুঠ পদকৰ সংখ্যা চাৰিটালৈ বৃদ্ধি পালে।
আনহাতে, শিৱ থাপা পৰাস্ত হ’লেও ভাৰতৰ আন এগৰাকী তাৰকা বক্সাৰ অমিত পোংঘালে ছেমিফাইনেলৰ খেলত চীনৰ প্ৰতিদ্বন্দ্বিক পৰাস্ত কৰি ফাইনেলত প্ৰবেশ কৰিছে।