কৰ্ণাটকৰ কংগ্ৰেছ চৰকাৰৰ ভিতৰত বিভাজনৰ ক’লা ছাঁ দেখা গৈছে! বৃহস্পতিবাৰে দিল্লীলৈ গৈছে দহজনীয়া কংগ্ৰেছ বিধায়কৰ এটা দল। কোৱা হৈছে যে এই আটাইকেইজনেই ৰাজ্যৰ উপ-মুখ্যমন্ত্ৰী ডি কে শিৱকুমাৰৰ শিবিৰৰ।
সূত্ৰই দাবী কৰিছে যে তেওঁলোকৰ খৰখেদাকৈ ৰাজধানী ভ্ৰমণৰ উদ্দেশ্য হৈছে সিদ্দাৰামাইয়াক সলনি কৰি কৰ্ণাটকৰ মুখ্যমন্ত্ৰীৰ আসনত শিৱকুমাৰক বহুওৱাৰ ব্যৱস্থা কৰা। ইতিমধ্যে সিদ্দাৰামাইয়া আৰু শিৱকুমাৰৰ সংঘাত অতি স্পষ্ট হৈ পৰিছে। ইফালে, বিধায়কসকলৰ দিল্লী ভ্ৰমণত পৰিস্থিতি অধিক জটিল হৈ পৰা বুলি সংশ্লিষ্ট মহলে ধাৰণা কৰে।
কিন্তু কিয় হঠাৎ শিৱকুমাৰক মুখ্যমন্ত্ৰী পদত বহুওৱাৰ দাবী? দৰাচলতে দুবছৰ পূৰ্বে কৰ্ণাটকত বৃহৎ জনাদেশ লৈ কংগ্ৰেছ পুনৰ ক্ষমতালৈ আহিছিল। তেতিয়াৰ পৰাই মুখ্যমন্ত্ৰীৰ চকীখনক লৈ দুটা শিবিৰত বিভক্ত হৈ পৰিছে। এফালে প্ৰবীণ নেতা তথা বৰ্তমানৰ মুখ্যমন্ত্ৰী সিদ্দাৰামাইয়া। আনহাতে, উপ-মুখ্যমন্ত্ৰী ডি কে শিৱকুমাৰ।
ইপিনে, সকলোৱে সৰ্বসন্মতিক্ৰমে মানি লৈছে যে ক্ষমতালৈ ঘূৰি অহাৰ ক্ষেত্ৰত শিৱকুমাৰৰ ভূমিকা আছিল অন্যতম। তাৰপিছতো সিদ্দাৰামাইয়াক মুখ্যমন্ত্ৰী হিচাপে নিযুক্তি দিয়া হৈছিল। বৰ্তমানৰ কৰ্ণাটক চৰকাৰে আঢ়ৈ বছৰ সম্পূৰ্ণ কৰিলে।
সিদ্দাৰামাইয়াই কাৰ্যভাৰ গ্ৰহণ কৰাৰ পিছৰে পৰা কৰ্ণাটকৰ ৰাজনৈতিক মহলত চৰ্চা চলি আহিছে যে তেওঁৰ ‘ম্যাদ’ৰ আধা সময় সম্পূৰ্ণ হোৱাৰ পিছত তেওঁ পদত্যাগ কৰিব। তেওঁৰ ঠাইত শিৱকুমাৰ আহিব। যদিও তেনে কোনো ঘোষণা কৰা হোৱা নাই। তথাপিও জল্পনা-কল্পনা অব্যাহত আছে।
কিন্তু আঢ়ৈ বছৰ পাৰ হোৱাৰ লগে লগে চৰ্চা শক্তিশালী হ’বলৈ আৰম্ভ কৰিছে। ডি কে শিবিৰৰ দাবী যে সেই সময়ত মুখ্যমন্ত্ৰীৰ চকীখনৰ বাবে আঢ়ৈ বছৰৰ সূত্ৰটো ঠিক কৰা হৈছিল। সেই সূত্ৰ অনুসৰি মুখ্যমন্ত্ৰী সলনি কৰাৰ সময় আহি পৰিছে। যদিও সিদ্দাৰামাইয়াই ইংগিত দিছে যে তেওঁ আঁতৰিবলৈ ইচ্ছুক নহয়।
ইপিনে, বৃহস্পতিবাৰেই কংগ্ৰেছ সভাপতি মল্লিকাৰ্জুন খাৰ্গেৰ সৈতে শিৱকুমাৰৰ ঘনিষ্ঠসকলৰ দলটোৰ এখন বৈঠক অনুষ্ঠিত হোৱাৰ কথা। আনকি শুকুৰবাৰে পুৱা এআইচিচিৰ সাধাৰণ সম্পাদক কেচি বেনুগোপালৰ সৈতেও আন এখন বৈঠকৰ কথা। একেটা বিষয়তে তাত আলোচনা কৰা হ’ব।
আনহাতে, এই সপ্তাহৰ শেষৰ ফালেও শিৱকুমাৰৰ ঘনিষ্ঠ আৰু অধিক বিধায়ক দিল্লীলৈ যাব বুলি চৰ্চা চলিছে। পৰিস্থিতি কোন ফালে গতি কৰে তালৈ সংশ্লিষ্ট মহলে দৃষ্টি ৰাখিছে।
