শ্ৰমিকৰ নামত আহিল ১৪ কোটি টকাৰ আয়কৰ জাননী! তাৰ পিছত….!
বিহাৰৰ এগৰাকী দৈনিক মজুৰি কৰা সাধাৰণ শ্ৰমিক। দৈনিক শ্মৰ বিনিময়ত লাভ কৰা মজুৰিৰে প্ৰতি মাহত হয়তু উপাৰ্জন হয় ১০ হাজাৰৰ পৰা ২০ হাজাৰ টকা। পিছে এই শ্ৰমিক গৰাকীৰ নামত আহিছে আয়কৰ বিভাগৰ এখন কৰ পৰিশোধৰ জাননী।
শ্ৰমিকগৰাকীয়ে পৰিশোধ কৰিবলগীয়া কৰৰ পৰিমাণ শুনিলে চকু কপালত উঠিব আপোনাৰো। ৰোহতাছৰ বাসিন্দা এই শ্ৰমিকগৰাকীৰ ঘৰলৈ আহে ১৪ কোটি টকাৰ আয়কৰৰ জাননী।
এই জাননী দেখি হতবাক হৈ পৰে শ্ৰমিকগৰাকী। স্তম্ভিত হৈ পৰে পৰে তেওঁৰ পৰিয়াল তথা ওচৰ-চুবুৰীয়া। আয়কৰ বিভাগৰ জাননীৰ সমুখীন হোৱা এই শ্ৰমিক গৰাকীৰ নাম মনোজ যাদৱ।
বিভাগৰ এই বৃহৎ ধনৰাশিৰ জাননী লাভ কৰি হতভম্ব হৈ পৰা যাদৱে স্পষ্ট কৰি দিয়ে, তেওঁৰ নামত থকা সম্পূৰ্ণ সম্পত্তি বিক্ৰী কৰিলেও পৰিশোধ কৰিব নোৱাৰিব এই বিশাল ধনৰাশি।
সোমবাৰে একাংশ আয়কৰ বিষয়াই তেওঁৰ বাসগৃহত উপস্থিত হয় আৰু কয় যে তেওঁৰ নামত বহু কোম্পানী চলি আছে আৰু প্ৰায় ১৪ কোটি টকাৰ কৰ পৰিশোধ কৰিবলৈ বাকী আছে।
কেন্দ্ৰীয় সংস্থাটোৰ বিষয়াৰ লগতে এই অনাকাংক্ষিত জাননীখন দেখি থতমত খালে যাদৱে। জেৰাৰ সময়ত তেওঁ বিষয়াসকলক কয় যে তেওঁ দৈনিক শ্ৰম কৰা এগৰাকী শ্ৰমিক আৰু তেওঁৰ সমগ্ৰ সম্পত্তি বিক্ৰী কৰিলেও কৰ দিব নোৱাৰিব।
মনোজে দিল্লী আৰু অন্যান্য ৰাজ্যত কাম কৰি বেংক একাউণ্ট খুলিবলৈ পেন কাৰ্ড আৰু আধাৰ কাৰ্ড জমা দিয়াৰ কথাও প্ৰকাশ কৰে। লগতে তেওঁৰ নথি-পত্ৰ কোনো দুষ্ট চক্ৰই প্ৰৱঞ্চনা কৰিবলৈ ব্যৱহাৰ কৰাৰ সন্দেহ প্ৰকাশ কৰে যাদৱে।
অৱশেষত মনোজৰ কথাত সত্যতাত প্ৰমাণ পাই আয়কৰ বিভাগৰ বিষয়াসকল মনোজ যাদৱে কোনো ধৰণৰ প্ৰৱঞ্চনা কৰা নাই বুলি নিশ্চিত হয় আৰু তেওঁৰ ঘৰৰ পৰা উভতি আহে।