শ্বেন ৱাৰ্ণৰ মৃত্যুৰ সন্দৰ্ভত এতিয়াও প্ৰশ্ন ৰৈ গৈছে। শেহতীয়াকৈ ডেইলী মেইলৰ এক বাতৰিয়ে হঠাতে এইগৰাকী কিংবদন্তি ক্ৰিকেটাৰৰ মৃত্যুৰ কাৰণক লৈ আলোড়নৰ সৃষ্টি কৰিছে। সেই প্ৰতিবেদনত কি আছে? অষ্ট্ৰেলিয়াৰ বলাৰগৰাকীৰ মৃত্যুৰ আঁৰত কি ৰহস্য ৰৈ গৈছে?
সংবাদ মাধ্যমৰ বাতৰি অনুসৰি থাইলেণ্ডৰ সেই ভিলাটোৰ পৰা এটা বস্তু আঁতৰাই পেলোৱা হয় য’ত অষ্ট্ৰেলিয়ান ক্ৰিকেট তাৰকাগৰাকীৰ মৃতদেহ উদ্ধাৰ কৰা হৈছিল।
প্ৰতিবেদনত লগতে দাবী কৰা হৈছে যে এজন আৰক্ষী বিষয়াই এজন উচ্চ পদস্থ বিষয়াৰ নিৰ্দেশত শ্বেন ৱাৰ্ণৰ ভিলাৰ পৰা এটা নিৰ্দিষ্ট ঔষধ আঁতৰাই পেলাইছিল। ঔষধৰ নাম ‘কামাগ্ৰা’। যিটো সাধাৰণতে বহু পুৰুষে যৌন বৰ্ধক হিচাপে ব্যৱহাৰ কৰে। এই ঔষধত ছিলডেনাফিল চাইট্ৰেট থাকে, যিটো ভায়াগ্ৰাতো পোৱা যায়। এই ঔষধ প্ৰস্তুত কৰা কোম্পানী ভাৰতীয়। যিটোৱে অধিক আগ্ৰহৰ সৃষ্টি কৰিছে।
নাম প্ৰকাশত অনিচ্ছুক থাইলেণ্ডৰ এজন আৰক্ষী বিষয়াই ডেইলী মেইলক জনাইছে যে তেওঁৱেই শ্বেন ৱাৰ্ণৰ ভিলাৰ পৰা উচ্চ পদস্থ বিষয়াৰ নিৰ্দেশত এই ঔষধ আঁতৰাইছিল। থাইলেণ্ডৰ আৰক্ষী বিষয়াগৰাকীয়ে দাবী কৰে যে এই ঘটনাত এজন আৰক্ষী বিষয়াও জড়িত আছিল।
ডেইলী মেইলে তেওঁৰ উদ্ধৃতিৰে কয় যে, “মোক কোৱা হৈছিল যে বিষয়টো অতি স্পৰ্শকাতৰ। আদেশ আহিল যে বটলটো আঁতৰাই দিব লাগে। সকলো নিৰ্দেশ ওপৰৰ পৰা আহিছিল। মই ভাবো ইয়াৰ লগত অষ্ট্ৰেলিয়াৰ এজন উচ্চ পদস্থ বিষয়াও জড়িত আছিল।”
আৰক্ষী বিষয়াজনে লগতে কয়, ‘সেইবাবেই চৰকাৰী প্ৰতিবেদনত দেখা গৈছে যে তেওঁৰ হাৰ্ট এটেকত মৃত্যু হৈছে। আৰু কোনো সবিশেষ দিয়া হোৱা নাই। ইয়াৰ আঁৰত বহু শক্তিশালী অদৃশ্য হাত আছে।’
সংবাদ মাধ্যমত উল্লেখ কৰা হৈছে যে শ্বেন ৱাৰ্ণৰ ঘৰত পোৱা কামাগ্ৰাৰ বটলৰ পৰা ক্ৰিকেটাৰগৰাকীয়ে কিমান ঔষধ সেৱন কৰিছিল সেয়া জানিব পৰা হোৱা নাই। ঘটনাস্থলীত তেজৰ বমিও উদ্ধাৰ কৰা হৈছে। এই ঔষধ সেৱনৰ বাবে শ্বেন ৱাৰ্নে তেজ বমি কৰিছিল নে নাই সেয়াও স্পষ্ট হোৱা নাই।
শ্বেন ৱাৰ্ণৰ ৫২ বছৰ বয়সত মৃত্যু হয়। থাইলেণ্ডৰ নিজৰ ভিলাতে উদ্ধাৰ কৰা হয় কিংবদন্তি ক্ৰিকেটাৰগৰাকীৰ মৃতদেহ। চুৰাট থানি হাস্পতালে মৰণোত্তৰ পৰীক্ষাৰ প্ৰতিবেদন প্ৰকাশ কৰিছিল। উল্লেখ কৰা হৈছিল যে শ্বেন ৱাৰ্ণৰ মৃত্যু স্বাভাৱিক আছিল আৰু এই কাণ্ডত সন্দেহজনক একো পোৱা নগ’ল।
