যোৱা ৩ নৱেম্বৰৰ পৰা কুৱেইটত চলি থকা এছিয়ান এয়াৰগান চেম্পিয়নশ্বিপৰ ৬ নৱেম্বৰত অনুষ্ঠিত মিক্সড এয়াৰগান চেম্পিয়নশ্বিপত স্বৰ্ণজয় কৰিছে অসম সন্তান হৃদয় হাজৰিকাই। মিক্সড ইভেণ্টত হৃদয়ৰ সৈতে স্বৰ্ণপদক দখল কৰিলে ভাৰতৰ আন এগৰাকী উদীয়মান মহিলা শ্বুটাৰ ইলাভেনিল ভালাৰিভানেও। ১০ মিটাৰ জুনিয়ৰ এয়াৰ ৰাইফল শাখাত স্বৰ্ণপদক দখল কৰে দুয়োগৰাকী খেলুৱৈয়ে। প্ৰতিযোগিতাত অৰ্জুন বাবুটা আৰু মেহুলী ঘোষে দখল কৰে ব্ৰঞ্জৰ পদক।
ইয়াৰ পূৰ্বে উদীয়মান শ্বুটাৰ গৰাকীয়ে দক্ষিণ কোৰিয়াত অনুষ্ঠিত যোৱা ৫২ সংখ্যক আই এছ এছ এফ বিশ্ব শ্বুটিং চেম্পিয়নশ্বিপৰ জুনিয়ৰ শাখাৰ ব্যক্তিগত ১০ মিটাৰ এয়াৰ ৰাইফল শাখাত সোণৰ পদক অৰ্জন কৰিছিল।
প্ৰচুৰ সম্ভাৱণাপূৰ্ণ এইগৰাকী যুৱ শ্বুটাৰৰ সফলতাত তেওঁৰ গৃহভূমি লখিমপুৰ জিলাৰ সমগ্ৰ নাৰায়ণপুৰবাসী আনন্দত আত্মহাৰা হৈ পৰিছে।
উল্লেখ্য যে নাৰায়ণপুৰৰ ঐতিহ্যমণ্ডিত মাধৱদেৱ মহাবিদ্যালয়ৰ অধ্যক্ষ ড০ শৰৎ হাজৰিকা আৰু ইভা শইকীয়া হাজৰিকাৰ একমাত্ৰ সন্তান হৃদয় হাজৰিকা।
