শ্বিলঙৰ বিভিন্ন স্থানত হিংসাত্মক ঘটনা সংঘটিত হোৱাৰ পাছত বৃহস্পতিবাৰে মেঘালয়ৰ ৰাজধানী চহৰখনত সান্ধ্য আইন জাৰি কৰা হৈছে।
বৃহস্পতিবাৰে হঠাতে পৰিস্থিতিৰ অৱনতি ঘটে আৰু ৰাইজৰ মাজত আতংকময় পৰিস্থিতিৰ সৃষ্টি হয়। দুস্কৃতিকাৰীয়ে হিংসাত্মক ৰূপ লৈ বাহনত অগ্নিসংযোগ কৰাৰ লগতে মটফ্ৰান অঞ্চলৰ পৰা আৰম্ভ কৰি খানদাই লেড অঞ্চললৈ থকা কিছুমান দোকান লণ্ডভণ্ড কৰে।
সংসদৰ দুয়োখন সদনতে নাগৰিকত্ব সংশোধনী বিধেয়ক ২০১৯’ গৃহীত হোৱাৰ পাছতে উত্তেজনাময় পৰিস্থিতিৰ মাজতে এই ঘটনাবোৰ সংঘটিত হয়।
প্ৰত্যক্ষদৰ্শীয়ে জানিবলৈ দিয়া মতে, এদল দুস্কৃতিকাৰীয়ে হঠাতে দোকানবোৰত আক্ৰমণ কৰিবলৈ আৰম্ভ কৰে আৰু উমছ’হছুম অঞ্চলৰ মাজেৰে গৈ হনুমানবক্স মতিলাল মাৰ্চেন্ট শ্বপৰ সন্মুখত ৰখাই থোৱা এখন বাহনত অগ্নিসংযোগ কৰে।
বৃহস্পতিবাৰে বিয়লি প্ৰায় ৩বজাৰ পৰা ঘটনাটো আৰম্ভ হয়।দুস্কৃতিকাৰীয়ে হনুমানবক্স মতিলাল মাৰ্চেন্ট শ্বপৰ মালিকৰ ML05-N-6001নম্বৰৰ গাড়ীখনত পেট্ৰ’ল বোম নিক্ষেপ কৰিছিল।
এখন অগ্নিনিৰ্বাপক গাড়ীয়ে জুই নিৰ্বাপিত কৰে যদিও গাড়ীখন বিধ্বস্ত হয়।
ইয়াৰ পাছতে দুস্কৃতিকাৰীয়ে খানদাই লেড অঞ্চললৈ যায় আৰু ড্ৰিমলেণ্ড চিনেমা হলৰ বিপৰীতে থকা এখন দোকানৰ কাপোৰত জুই লগাই দিয়ে।
ৰাস্তাত লণ্ডভণ্ড কৰা দোকানৰ গ্লাছ সিচৰতি হৈ পৰে।
এই ঘটনাৰ বাতৰি বিয়পি পৰাৰ পাছতে অঞ্চলটোৰ আতংকিত লোকসকলে দোকান পাহাৰ বন্ধ কৰি দিয়ে।
বজাৰ সমাৰ কৰিবলৈ গৈ থকা লোকসকলে লক্ষ্যহীনভাৱে দৌৰিবলৈ আৰম্ভ কৰে।
ততাতয়াকৈ সুৰক্ষা বাহিনীৰ লোক ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে।
মটফ্ৰান অঞ্চল আৰু খানদাই লেড অঞ্চলত আৰক্ষী মোতায়েন কৰা হৈছে।
ইয়াৰ পাছতে জইয়’ লেংছনিনাঙত এখন মটৰবাইক আৰু জইয়’ৰ প্ৰেছবাইটেৰিয়ান চাৰ্চৰ সমীপত এখন মাৰুতি ভান জ্বলাই দিয়ে।
