শিৱসাগৰলৈ সুখবৰ। ভাৰত চৰকাৰৰ অধীনস্থ স্বচ্ছ ভাৰত অভিযানৰ (নগৰ অঞ্চল) অধীনত ‘স্বচ্ছ সৰ্বেক্ষণ ২০১৯’ৰ বাবে শিৱসাগৰ নগৰক উত্তৰ-পূবৰ ভিতৰত স্বচ্ছ নগৰৰ সন্মান প্ৰদান কৰা হয়। দিল্লীৰ বিজ্ঞান ভৱনৰ প্লেনেৰী হ’লত আয়োজিত ভাৰত চৰকাৰৰ আৱাসিক আৰু নগৰ উন্নয়ন বিভাগৰ দ্বাৰা এই বঁটা প্ৰদান কৰা হয়।
এই বঁটা প্ৰদান অনুষ্ঠানত মুখ্য অতিথি হিচাপে দেশৰ ৰাষ্ট্ৰপতি ৰামনাথ কোবিন্দ উপস্থিত থাকে। ভাৰত চৰকাৰৰ আৱাসিক আৰু নগৰ উন্নয়নৰ স্বতন্ত্ৰ ৰাজ্যিক মন্ত্ৰী হৰিদ্বীপ সিং পুৰীয়ে এই বঁটা প্ৰদান কৰে। শিৱসাগৰ পৌৰসভাৰ পৌৰনেত্ৰী মৃদুস্মিতা সিংহ, উপ-পৌৰপতি আজাদ আলম আৰু নগৰ প্ৰকল্প বিষয়া মৃদুল কুমাৰ নাথে এই বঁটা গ্ৰহণ কৰে।
বঁটা গ্ৰহণ কৰি উৎফুল্লিত শিৱসাগৰ পৌৰসভাৰ পৌৰনেত্ৰী মৃদুস্মিতা সিংহই সোমবাৰে সাংবাদিকৰে হোৱা মত বিনিময় কৰি কয় যে শিৱসাগৰবাসীৰ বাবে ই এক গৌৰৱ। শিৱসাগৰীয়া ৰাইজৰ সহায় সহযোগিতাৰ বাবে আজি ৰাষ্ট্ৰীয় স্তৰত শিৱসাগৰে স্বচ্ছ নগৰৰ সন্মান লাভ কৰিবলৈ সক্ষম হ’ল।
এই সন্মান লাভৰ বাবে প্ৰতিজন শিৱসাগৰীয়াক ধন্যবাদ জনায় পৌৰনেত্ৰী গৰাকীয়ে।তদুপৰি, তেওঁ আগন্তুক দিনত শিৱসাগৰ নগৰক আৰু অধিক স্বচ্ছ কৰি ৰখাৰ লগতে সৌন্দয্য বৰ্দ্ধনৰ বাবে বহুকেইটা আঁচনি হাতত ল’ব বুলি জানিব দিয়ে।
উল্লেখ্য যে উত্তৰ-পূবৰ ৫০ হাজাৰৰ পৰা ১ লাখ জনসংখ্যা বসতিপূৰ্ণ চহৰৰ মাজৰ পৰা স্বচ্ছ ভাৰত মিশ্যনৰ (নগৰ অঞ্চল) অধীনত স্বচ্ছ সৰ্বক্ষণ ২০১৯ৰ বাবে শিৱসাগৰ চহৰক নিৰ্বাচন কৰে। বিশ্বৰ ভিতৰত সবাটোতকৈ বৃহৎ স্বচ্ছতাৰ সমীক্ষা স্বচ্ছ সৰ্বেক্ষণৰ জৰিয়তে ৪২৩১ খন পৌৰ নিকায়ৰ ৬৪ লাখ ভাৰতীয় নাগৰিকৰ মতামত আৰু সামাজিক মাধ্যমৰ পৰা প্ৰায় ৪ কোটি জনগণৰ মতামতৰ ভিত্তিত শিৱসাগৰ চহৰে এই বঁটা লাভ কৰে।
শিৱসাগৰ পৌৰ সভাই বিগত সময়ত জিলা প্ৰশাসন আৰু চি আৰ পি এফৰ সহযোগত নগৰৰ মাজমজিয়াত থকা শিৱসাগৰ পুখুৰীৰটো চাফা কৰাৰ লগতে নগৰৰ বিভিন্ন স্থানত স্বচ্ছ ভাৰত অভিযানৰ জৰিয়তে সময়ে সময়ে চাফাই অভিযানৰ দৰে কাৰ্যসূচী ৰূপায়ন কৰি সুন্দৰ পদক্ষেপ গ্ৰহণ কৰি আহিছে।
