জনপ্ৰিয় পঞ্জাৱী গায়ক সিদ্ধু মুছেৱালা হত্যাকাণ্ডৰ গোচৰত আন এটা সফলতা লাভ কৰিছে পঞ্জাৱ আৰক্ষীয়ে। হত্যাকাণ্ডৰ তদন্ত চলাই থকা আৰক্ষীয়ে এটা নতুন চিচিটিভি ফুটেজ লাভ কৰিছে। এই ফুটেজত সিদ্ধু মুছেৱালাৰ হত্যাত জড়িত হত্যাকাৰীসকলৰ সন্ধান লাভ কৰিছে আৰক্ষীয়ে।
এটা পেট্ৰ’ল পাম্পৰ পৰা সংগ্ৰহ কৰা এই নতুন চিচিটিভি ফুটেজটোত সন্দেহযুক্ত হত্যাকাৰী কেইজনক এখন বলেৰ’ গাড়ীৰ সৈতে দেখিবলৈ পোৱা গৈছে। ফুটেজত দেখা পোৱা গাড়ীখন মুছেৱালাৰ হত্যাত ব্যৱহাৰ কৰা হৈছিল বুলি আৰক্ষীয়ে সন্দেহ কৰিছে। এই ফুটেজটো আৰাক্ষীয়ে হাৰিয়ানাৰ ফতেহাবাদ আৰু পঞ্জাৱৰ সাৰদুলগড়ৰ মাজত থকা এটা পেট্ৰ’ল পাম্পৰ পৰা সংগ্ৰহ কৰিছে।
ফুটেজটোত দেখা বগা বলেৰ’ গাড়ী খনৰ সৈতে থকা ব্যক্তি দুজনক পাৰ্বত ফৌজী আৰু জণ্টি বুলি চিনাক্ত কৰিছে আৰক্ষীয়ে। সিদ্ধু মুছেৱালাৰ হত্যাৰ আগে আগে চিচিটিভি- ত বন্দী হোৱা এই ফুটেজত দেখা ব্যক্তি দুজনক হাৰিয়ানাৰ চনিপতৰ কুখ্যাত অপৰাধী বুলি আৰক্ষীয়ে দাবী কৰিছে। ইতিমধ্যে দুয়োগৰাকীৰ সন্ধানত তদন্ত আৰম্ভ কৰিছে বুলি আৰক্ষীয়ে জানিবলৈ দিছে।
উল্লেখ্য যে ইয়াৰ পূৰ্বে পঞ্জাৱ আৰক্ষীয়ে ফতেহাবাদৰ বিছলা গাঁৱত লাভ কৰা এটা চিচিটিভি ফুটেজ পৰীক্ষা কৰিছিল। এই ফুটেজতো একেখন গাড়ীয়ে ইন্ধন ভৰাবলৈ পেট্ৰ’ল পাম্পত ৰৈছিল বুলি জানিব পৰা গৈছে।
ইতিমধ্যে পঞ্জাৱ আৰক্ষীয়ে হত্যাৰ গোচৰত পৱন আৰু নাছিব নামৰ দুজন ব্যক্তিক সন্দেহৰ ভিত্তিত আটক কৰিছে। তদুপৰি যোৱা ৩১ মে’ত পঞ্জাৱ আৰক্ষীয়ে উত্তৰাখণ্ডৰ পৰা মনপ্ৰীত সিং নামৰ এজন ব্যক্তিসহ পাঁচজন ব্যক্তিক মুছেৱালাৰ হত্যাকাণ্ডত জড়িত আক্ৰমণকাৰীসকলক বাহন যোগান ধৰাৰ অভিযোগত গ্ৰেপ্তাৰ কৰিছিল।
