‘‘ৰাষ্ট্রীয় খাদ্য সুৰক্ষা আইন-২০১৩ সংশোধন কৰি ৰাজ্য চৰকাৰে যদি তিনি টকীয়া দৰৰ চাউল হিতাধিকাৰীক এটকা দৰত দিব পাৰে তেন্তে প্রাদেশিকীকৰণ আইন-২০১৭ সংশোধন কৰি ভেন্সাৰ শিক্ষানুষ্ঠানত কৰ্মৰত শিক্ষক-কৰ্মচাৰীক সকাহ দিব নোৱাৰাতো চৰকাৰখনৰ অগণতান্ত্ৰিক চৰিত্ৰ৷”এই অভিযোগ অসম শিক্ষক-কৰ্মচাৰী ঐক্যমঞ্চৰ৷
ঐক্যমঞ্চৰ কেন্দ্ৰীয় সমিতিৰ কাৰ্যকৰী সভাপতি ছবেদ ভূঞা আৰু সহকাৰী সাধাৰণ সম্পাদক প্ৰাঞ্জল কুমাৰ শৰ্মাই এক বিবৃতিৰ জৰিয়তে ৰাজ্য চৰকাৰৰ প্ৰতি এই অভিযোগ উত্থাপন কৰে৷ ৰাষ্ট্রীয় খাদ্য সুৰক্ষা আইন যদি ৰাজ্য চৰকাৰে সংশোধন কৰি তিনি টকীয়া দৰৰ চাউল এটকা দৰত দিব পাৰে তেন্তে প্রাদেশিকীকৰণ আইন-২০১৭ সংশোধন কৰি ভেন্সাৰ শিক্ষানুষ্ঠানত কৰ্মৰত শিক্ষকসকলৰ পদ সমূহ প্রাদেশিকীকৰণৰ কৰিব নোৱাৰাৰ যুক্তি ক’ত বুলি বিবৃতিটোৰ জৰিয়তে চৰকাৰক প্ৰশ্ন উত্থাপন কৰে শিক্ষক কৰ্মচাৰী ঐক্যমঞ্চই৷
আনহাতে, ঐক্যমঞ্চৰ নেতাদ্বয়ে জনায় যে, ৰাজহুৱা শিক্ষাখণ্ডত অৰিহণা আগবঢ়াই অহা ভেন্সাৰ শিক্ষানুষ্ঠানবোৰক পৰিকল্পিতভাবে বন্ধ কৰাৰ বাবে পৰিবৰ্তনকামী চৰকাৰখনে ষড়যন্ত্ৰ চলাইছে৷প্ৰাথমিক পৰ্যায়ৰ ভেন্সাৰ শিক্ষানুষ্ঠানবোৰক আন্ত:গাঁথনি, সাজ-পোছাক, স্কুল ডাইচ আদি বন্ধ কৰি মাতৃভাষা মাধ্যমৰ ভেঞ্চাৰ শিক্ষানুষ্ঠানবোৰ বন্ধ কৰিবলৈ চৰকাৰখনে ষড়যন্ত্ৰ চলোৱা বুলি বিবৃতিটোত উল্লেখ কৰা হয়৷
ভেন্সাৰ শিক্ষানুষ্ঠানত কৰ্মৰত শিক্ষক-কৰ্মচাৰী সকলৰ আৰ্থিক নিৰাপত্তা সুনিশ্চিত কৰাৰ বাবে বিবৃতিটোৰ জৰিয়তে ৰাজ্য চৰকাৰক পুনৰবাৰ দাবী জনায় অসম শিক্ষক-কৰ্মচাৰী ঐক্যমঞ্চই৷
উল্লেখযোগ্য যে, বহু অপ্ৰাদেশীকৃত বিদ্যালয়ৰ শিক্ষক-কৰ্মচাৰীয়ে দীৰ্ঘদিন ধৰি শিক্ষকতা কৰি বিনাবেতনে অৱসৰ গ্ৰহণ কৰিছে। এইসকল শিক্ষকৰ পৰিয়ালৰ আৰ্থিক দুৰাৱস্থাৰ কথা চৰকাৰে এবাৰো চিন্তা নকৰিলে বুলি ঐক্য মঞ্চই উল্লেখ কৰে।