দিল্লীৰ মুখ্যমন্ত্ৰী অৰবিন্দ কেজৰিৱালৰ ওপৰত এইবাৰ খঙত ফাটি পৰিছে ছিংগাপুৰৰ প্ৰশাসন ।ছিংগাপুৰৰ প্ৰশাসনে আনকি কেজৰিৱালক তেওঁ কৰা এটা বিশেষ মন্তব্যৰ বাবে জবাবদিহিও কৰিছে।
শেহতীয়াকৈ দিল্লীৰ মুখ্যমন্ত্ৰীগৰাকীয়ে এইবুলি মন্তব্য কৰিছিল যে ছিংগাপুৰত ক’ৰ’নাৰ এটা নতুন ষ্ট্ৰেইন পোৱা গৈছে।
এই নতুন ষ্ট্ৰেইন বিধ পূৰ্বৰ সকলো ষ্ট্ৰেইনতকৈ বেছি ভয়াৱহ বুলিও কেজৰিৱালে মন্তব্য কৰিছিল । তেওঁ এইবুলিও কৈছিল যে ছিংগাপুৰৰ নতুন ক’ৰ’নাৰ ষ্ট্ৰেইন বিধে শিশুসকলক বেছিকৈ আক্ৰান্ত কৰে।
ভাৰতত ক’ৰ’নাৰ তৃতীয় ঢৌ ছিংগাপুৰৰ ষ্ট্ৰেইনৰ পৰাই হ’ব পাৰে বুলিও কেজৰিৱালে কৈছিল। দিল্লীৰ মুখ্যমন্ত্ৰীৰ এনে মন্তব্যৰ পিছতে ভাৰত চৰকাৰক উভতি ধৰিছে ছিংগাপুৰৰ প্ৰশাসনে ।
ছিংগাপুৰৰ প্ৰশাসনে প্ৰতিক্ৰিয়া ব্যক্ত কৰাৰ সময়তে ভাৰতৰ বৈদেশিক দপ্তৰে এইবুলি স্পষ্ট কৰি দিছে যে ছিংগাপুৰৰ ষ্ট্ৰেইন বুলি ক’ৰ’নাৰ কোনো ষ্ট্ৰেইন নাই।
এইক্ষেত্ৰত কেজৰিৱালে কৰা মন্তব্যৰ কোনো ভিত্তি নাই বুলি ভাৰতৰ বৈদেশিক দপ্তৰে স্পষ্ট কৰি দিছে ।
উল্লেখ্য শেহতীয়কৈ ব্ৰিটেইনত ভাৰতত ক্ৰমবিৱৰ্তন ঘটা ক’ৰ’নাৰ B.1.617 ষ্ট্ৰেইনকলৈ বিশ্বৰ বিজ্ঞানীসকল বেছ চিন্তিত হৈ পৰা পৰিলক্ষিত হৈছে ।
ব্ৰিটেইনৰ চৰকাৰেও দেশ খনৰ বহু লোক ক’ৰ২নাৰ ভাৰতীয় ষ্ট্ৰেইনত আক্ৰান্ত হোৱা বুলিই কৈ আহিছে। ইপিনে ক’ৰ’নাৰ কোনো ছিংগাপুৰৰ ষ্ট্ৰেইনৰ অৱস্থিতি নাই বুলি আজি ভাৰতৰ বৈদেশিক দপ্তৰে স্পষ্ট কৰি দিয়াৰ পিছতো দিল্লীত এই ষ্ট্ৰেইনৰ সংক্ৰমণ ৰোধ কৰিবলৈ কেজৰিৱাল চৰকাৰে বিশেষ টাস্ক ফোৰ্চ গঠন কৰিছে।
বিশেষকৈ শিশুসকলক ক’ৰ’নাৰ পৰা ৰক্ষা কৰিবলৈয়েই কেজৰিৱাল চৰকাৰে এনে টাস্ক ফোৰ্চ গঠন কৰা বুলি জানিব পৰা গৈছে।
