জনপ্ৰিয় কণ্ঠশিল্পী বাবুৰ নতুনকৈ মুক্তি পোৱা ‘মাজুলী গাভৰু’ গীতক লৈ বিতৰ্কৰ সূত্ৰপাত হৈছিল তাৰ পাছতে নিজৰ ফেইচবুক একাউন্টৰ জৰিয়তে ক্ষমা খুজিলে বাবুৱে।
উল্লেখযোগ্য যে ‘মাজুলী গাভৰু’ নামৰ গীতটোত মাজুলীৰ সত্ৰ-সংস্কৃতিক বিকৃতধৰণেৰে উপস্থাপন কৰাৰ অভিযোগ উত্থাপিত হৈছে।
বাবুৰ এই গীতটিৰ পাছতে চ’ছিয়েল মেডিয়াৰ জৰিয়তে বহুতে সমালোচনা কৰাৰ লগতে মাজুলীত বাবুৰ প্ৰৱেশ নিষিদ্ধ বুলি ঘোষণা কৰিছিল মাজুলীৰ একাংশ সচেতন জনতাই। আনকি কন্ঠশিলী বাবু বৰুৱাৰ বিৰুদ্ধে গোচৰ তৰাৰো হুংকাৰ দিছিল একাংশই।
তাৰ পাছতে বাবুৱে ফেইচবুকৰ জৰিয়তে ক্ষমা খুজি এইদৰে লিখে ‘মোৰ নতুন আধুনিক গীত “মাজুলী গাভৰু” ৰ Video ক লৈ যি বিতৰ্কৰ সূত্ৰপাত হৈছে সেয়া মোৰ একান্তই অনিচ্ছাকৃত। কোনো ধৰ্মীয় পৰম্পৰাৰ অনুভূতিক আঘাত কৰাৰ দু: সাহস মই কেতিয়াও কৰা নাই বা আগলৈও নকৰোঁ।‘
‘যিহেতু”মাজুলী গাভৰু” গীত টিৰ Video টোৱে সত্ৰীয়া পৰম্পৰাৰ অনুভূতিত আঘাত হানিছে বুলি অভিযোগ উত্থাপিত হৈছে, সেয়ে মই অত্যন্ত ব্যথিত হৈছো আৰু এই Facebook মঞ্চৰ পৰাই এই অনিচ্ছাকৃত ভুলৰ বাবে সকলোৰে ওচৰত মই ক্ষমা ভিক্ষা প্ৰাৰ্থনা কৰিলোঁ লগতে গীত টিৰ Video টো উল্লেখিত YouTube channel ত সম্পাদনা কৰিম বুলি প্ৰতিশ্ৰুতি দিলোঁ,’’ বাবুৱে লগতে লিখে।
অৱশ্যে, বাতৰি লিখালৈকে গীতটি YouTube channel টোৰ পৰা আঁতৰ কৰা নাই বাবুৱে।
বাবুৰ বিতৰ্কিত গীতটোৰ এটা অংশত মাজুলীৰ সত্ৰত মহিলাৰ প্ৰবেশ নিষিদ্ধ বুলি দেখুওৱাৰ লগতে মহিলাই সত্ৰত প্ৰবেশ কৰাৰ বাবে এটা পৰিয়ালক এঘৰীয়া কৰাৰ দৃশ্যও দেখুওৱা হৈছে।
ইয়াৰ লগতে এজন ভকতে এগৰাকী মহিলাক লঠিয়াই গুৰিয়াই উলিয়াই দিয়া গীতটিৰ ভিডিঅ’টোত দেখা গৈছে।
তদুপৰি সত্ৰীয়া পোচাক আৰু মাজুলীৰ মুখা শিল্পৰো বিকৃত উপস্থাপন হোৱাৰ অভিযোগ উত্থাপন হৈছে। গানৰ ভিচিঅ’টোত আছে মাজুলীৰ মুখা পিন্ধি ভিক্ষা খোজাৰ দৃশ্য।
শেহতীয়া আপডেট- নৰ্থ-ইষ্ট নাওত বাতৰিটো প্ৰকাশিত হোৱাৰ পাছতে কণ্ঠশিল্পী গৰাকীয়ে ইউটিয়ুবৰ পৰা বিতৰ্কিত গানটো ডিলিট কৰি দিয়ে।
