পেডেল মাৰি, টেক্সী গাড়ী লৈ ১০০ কলা-কুশলীৰে সদল-বলে কংগ্ৰেছী হ’ল বাবু-নেকিব-অজয়
কন্ঠশিল্পী বাবু বৰুৱাই পেডেল মাৰি, নেকিবে টেক্সি গাড়ী লৈ অজয় ফুকনসহ ১০০ কলা-কুশলীয়ে কংগ্ৰেছত আজি যোগদান কৰে।
দিছপুৰস্থিত মানবেন্দ্ৰ শৰ্মা কমপ্লেক্সত প্ৰদেশ কংগ্ৰেছৰ সভাপতি ৰিপুন বৰা আৰু অন্য জ্যেষ্ঠ নেতাৰ উপস্থিতিত তিনিও গৰাকী কন্ঠশিল্পীয়ে কংগ্ৰেছী পোছাক পিন্ধে।
কংগ্ৰেছত যোগদান কৰি কন্ঠশিল্পী নেকিব হুছেইনে নৰ্থ ইষ্ট নাওৰ সাংবাদিকৰ আগত কয় ‘আমাৰ হাতত ৰাষ্ট্ৰীয় দল বুলি ক’লে কংগ্ৰেছেই আছে। তেওঁলোকৰ লগতেই কা ক লৈ যি সমস্যা বা সাধাৰণ ৰাইজৰ যি সমস্যা সেইখিনিৰ সমাধান কৰিব লাগিব। বিজেপি চৰকাৰ জনসাধাৰণৰ সমস্যা সমাধানত গুৰুত্ব দিয়া নাই। আমি বান্ধি দিয়া এজেণ্ডাসমূহ তেওঁলোকে মানি লৈছে গতিকে আমি কংগ্ৰেছত যোগদান কৰিলো।‘
আনহাতে, কংগ্ৰেছত যোগদান কৰি আগত কয় ‘বিজেপিত যোৱা শিল্পীসকল কেৱল নিজৰ সুবিধাৰ বাবে গৈছে। আমি নিজৰ সুবিধাৰ কথা ভাবিলোহেঁতেন কংগ্ৰেছ দলৰ পৰিৱৰ্তে বিজেপিত যোগদান কৰিলোহেঁতেন। কা বিৰোধী শক্তি হিচাপে ১০০ জনীয়া শিল্পী-কলা কুশলীৰ এটা শক্তি কংগ্ৰেছৰ সৈতে চামিল হৈছো।‘
‘বিজেপিত যোৱা শিল্পীসকল কা বিৰোধী আন্দোলনলৈ ৰাইজৰ ৰোষত পৰাৰ ভয়তহে যোগদান কৰিছিল। তেওঁলোকে মনৰ পৰা যোগদান কৰা নাছিল। তেওঁলোকে মুখখন দেখুৱাবলৈ আন্দোলনলৈ আহিছিল কিন্তু প্ৰকৃততে অন্তৰৰ পৰা অহা নাছিল।‘ বিজেপিলৈ গমন কৰা কা বিৰোধী আন্দোলনত অংশগ্ৰহণ কৰা শিল্পীসকলক কটাক্ষ কৰি ফুকনে এইদৰে কয়।
ইপিনে, অজয় ফুকনৰ বক্তব্যৰ পৰা স্পষ্ট হৈ পৰিল যে কংগ্ৰেছে টিকট ঘোষণাৰ পূৰ্বে নিজৰ নিজৰ সমষ্টি ঠিক কৰি ল’লে বাবু, নেকিব আৰু অজয়ে।
অজয় ফুকনে জনোৱা অনুসৰি এইবাৰ কংগ্ৰেছৰ হৈ পশ্চিম গুৱাহাটী সমষ্টিৰ পৰা বাবু বৰুৱাই, চাবুৱা সমষ্টিৰ পৰা অজয় ফুকন আৰু হাজো সমষ্টিৰ পৰা নেকিব হুছেইনে প্ৰাৰ্থীত্ব পোৱাৰ সম্ভাৱনা আছে।