কেকে আৰু নাই! শেষ হৈ গ’ল সেই যাদুকৰী কণ্ঠ! নেপথ্যৰ সেই ‘অলবিদা অলবিদা’ গানৰ দৰেই সংগীত জগতৰ কোটি কোটি অনুৰাগীক শোকাহত কৰি ‘অলবিদা’ ক’লে কেকেই। যাদুকৰী কণ্ঠৰে সংগীতৰ মঞ্চখনক কল্লোলিত কৰি তোলা কৃষ্ণকুমাৰ কুন্নাথ, প্ৰতিজন অনুৰাগীৰ হেঁপাহৰ কেকেৰ কণ্ঠ ৰুদ্ধ হ’ল চিৰদিনৰ বাবে।
মঙ্গলবাৰে নিশা কলকাতাত এক সংগীতানুষ্ঠান প্ৰদৰ্শনৰ পিছতে চিৰদিনৰ বাবে চকু মুদিলে কেকেই।
হৃদৰোগত আক্ৰান্ত হৈ মাত্ৰ ৫৩ বছৰ বয়সতে অকাল মৃত্যুক আঁকোৱালি ল’লে সেউজ কণ্ঠৰ শিল্পীগৰাকীয়ে।
কলকাতাৰ নজৰুল মঞ্চত সংগীতানুষ্ঠানৰ পিছতে কেকে হঠাতে বাগৰি পৰে। লগে লগে তেওঁক স্থানীয় এখন ব্যক্তিগত চিকিৎসালয়লৈ লৈ যোৱা হয়।
কিন্তু কলকাতাৰ চিএমআৰআই চিকিৎসালয়ৰ চিকিৎসকসকলে তেওঁক মৃত ঘোষণা কৰে।
উল্লেখ্য যে মৃত্যুৰ অলপ সময় পূৰ্বে কেকেই নিজৰ সামাজিক মাধ্যমৰ একাউণ্টত কলকাতাৰ নজৰুল মঞ্চত তেওঁৰ সংগীতানুষ্ঠানৰ ফটো পোষ্ট কৰিছিল।
বিংশ শতিকাৰ শেষ সময়ছোৱাত অভিষেক ঘটোৱাৰ পিছতে ভাৰতীয় চলচ্চিত্ৰ জগতখনৰ আটাইতকৈ বহুমুখী প্ৰতিভাৰ গায়ক হিচাপে পৰিগণিত হৈ পৰিছিল এই দৰদী কণ্ঠৰ কণ্ঠশিল্পী গৰাকী।
হিন্দীৰ উপৰি কেকেই তামিল, তেলেগু, কানাড়া আৰু বাংলা, গুজৰাটীকে ধৰি কেইবাটাও ভাৰতীয় ভাষাৰ সংগীতত কণ্ঠদান কৰিছিল। অসমীয়া ভাষাৰ গানতো কণ্ঠদান কৰিছিল শিল্পীগৰাকীয়ে।
বিজ্ঞাপনৰ জিংগলৰ বাবে গান গাই কেৰিয়াৰ আৰম্ভ কৰা কেকেই এ.আৰ. ৰহমানৰ চাউণ্ডট্ৰেৰ যোগেৰে বলীউডত আত্মপ্ৰকাশ কৰে। ১৯৯৯ চনত তেওঁ ‘পল’ শীৰ্ষক তেওঁৰ প্ৰথম এলবাম মুকলি কৰে।
উক্ত এলবামৰ “পল” আৰু “য়াৰো” গানকেইটাই ভাৰতীয় সংগীতপ্ৰেমী সকলক বিশেষভাৱে আকৰ্ষণ কৰে। ইয়াৰ পাছতে জনপ্ৰিয় হৈ পৰে কেকে।
তাৰ পিছতে প্ৰতিজন সংগীতপ্ৰেমী লোকৰ হৃদয়ত স্থান পায় কেকেই। উপহাৰ দিয়ে এটাৰ পাছত আন এটাকৈ জনপ্ৰিয় গান। অৱশ্যে শেহতীয়া দশকটোত কেকেই লাভ নকৰিলে তেনে উচ্চস্তৰীয় সুযোগ।
আৰু অৱশেষত মঙ্গলবাৰে মাজনিশা সকলোকে হতচকিত কৰি বিদায় ল’লে মহাতাৰকা গৰাকীয়ে। তেওঁৰ গানৰ সেই ‘হাম ৰহে য়া না ৰহে কল, কল য়াদ আয়েংগে য়ে পল’ কলিৰ দৰেই প্ৰতিগৰাকী সংগীতপ্ৰেমীৰ হৃদয়ত বহি ৰ’ব কেকে।
