দেশত এতিয়া ক’ৰণাৰ দ্বিতীয় ঢৌ। ক’ৰণাসৃষ্ট পৰিৱেশে সলনি কৰিছে বহুতৰে জীৱন প্ৰণালী।
সলনি কৰিব লগীয়া হৈছে জীৱন- জীৱিকাৰ পথ।
দুটা বছৰ ক’ৰণাৰ বাবে ৰাজ্যৰ বহু শিল্পীৰ তথা সাংস্কৃতিক কৰ্মীৰ উপাৰ্জনৰ পথ ৰুদ্ধ হৈ পৰিছে। যাৰ বাবে আৰ্থিক সংকটৰ পৰা ৰক্ষা পাবলৈ বহু শিল্পীয়ে সংগীত চৰ্চাৰ উপৰিও আৰম্ভ কৰিবলগীয়া হৈছে আন ব্যৱসায়।
এইজন বাস্তৱ নাথ। অসমৰ এগৰাকী জনপ্ৰিয় কন্ঠ শিল্পী। অসমত প্ৰথম ৰেপ সংগীতৰ আৰম্ভ কৰিছিল এইগৰাকী শিল্পীয়ে। ইয়াৰোপৰি বহু জনপ্ৰিয় বিহুগীতৰ লগতে কেইবাখনো অসমীয়া ছবি, বহু এলবামৰ লগতে বহুকেইখন ভ্ৰাম্যমান থিয়েটাৰত গীত গাই জনপ্ৰিয় হৈ পৰিছিল বাস্তৱ নাথ।
কিন্তু কাল ক’ৰনাই যেন আন শিল্পীৰ দৰে বাস্তৱৰ জীৱনলৈও নমাই আনিলে কাল অমানিশা। বিগত দুটা বছৰ কোনোধৰণৰ সাংস্কৃতিক অনুষ্ঠান, বিহু সন্মিলন অনুষ্ঠিত নোহোৱাৰ লগতে মুক্তি লাভ কৰা নাই বহু অসমীয়া চলচিত্ৰ।
সেয়েহে আৰ্থিক সংকটৰ পৰা মুক্তি লাভ কৰিবলৈ আন বহু শিল্পীৰ দৰে বাস্তৱে সলনি কৰিছে জীৱন জীৱিকাৰ পথ।
এইয়া বাস্তৱ নাথে গঢ়ি তোলা ‘AS 04 BM’ নামৰ এখন ফাৰ্ম। এই ফাৰ্মত বাস্তৱে আধুনিক পদ্ধতিৰে ছাগলী, কুকুৰা, হাঁহ আদি পুহি আৰ্থিক ভাৱে স্বাৱলম্বী হোৱাৰ প্ৰয়াস কৰিছে। ইয়াৰ মাজতে বাস্তৱ নাথে অব্যাহত ৰাখিছে সংগীত চৰ্চাও।
বাস্তৱে পঞ্জাৱ, ৰাজস্থান আদিকে ধৰি বিভিন্ন স্থানৰ পৰা উন্নত মানৰ ছাগলী অনাৰ লগতে চিলকী চিকেন, কাদকনাথ চিকেন, উন্নত প্ৰজাতিৰ হাঁহ আদি পালন কৰি নিজৰ লগতে আৰু বহু কেইজন নিবনুৱাক কৰ্ম সংস্থাপন দি আগুৱাই গৈছে বাস্তৱ নাথ।