উত্তৰপ্ৰদেশৰ মুখ্যমন্ত্ৰী যোগী আদিত্যনাথে ঘোষণা কৰিছে যে তেওঁৰ ৰাজ্যৰ হস্পিতালসমূহত অক্সিজেনৰ অভাৱ নাই।
কিন্তু শেহতীয়া এটা ঘটনাই তেওঁৰ এই ঘোষণাৰ ফোপোলা স্বৰূপ উদঙাই দেখুৱালে।
ৰাজ্যখনৰ প্ৰয়াগৰাজৰ এক হস্পিতালত ক’ভিড ৰোগী আৰু ৰোগীসকলৰ অভিভাৱকসকলে অক্সিজেন বিচাৰি হাবাথুৰি খাইছিল।
কিন্তু কৰ্তব্যৰত আৰক্ষীসকলে তেওঁলোকক দিয়ে এটা আজৱ সমাধান।
মাকৰ বাবে অক্সিজেন বিচাৰি হাবাথুৰি খোৱা এজন লোকক আৰক্ষীয়ে কয় যে ৰোগীক এজোপা আঁহত গছৰ তললৈ নি তাত বহোৱাই থলেই শৰীৰত অক্সিজেনৰ মাত্ৰা বাঢ়ি যাব!
‘লালনটপ’ (Lallantop) নামৰ এটা সংবাদমাধ্যমৰ আগত ৰোগীৰ এজন আত্মীয়ই চকুপানী টুকি টুকি জনায় যে আৰক্ষীয়ে ৰোগী আৰু আত্মীয়সকলক ঘৰতে থাকিবলৈ কৈছে, কাৰণ হস্পিতালত ভীৰ কৰি লাভ নাই।
আত্মীয়জনে কয় যে তেওঁলোকক আনকি ঘৰতো অক্সিজেনৰ প্ৰয়োজন আৰু অক্সিজেন যোগান ধৰিবলৈ কোনো নাই।
কেৱল এয়াই নহয়, ৰোগীসকলৰ বহুতো আত্মীয়ই প্ৰয়াগৰাজৰ বিজেপি বিধায়ক হৰ্ষবৰ্ধন বাজপেয়িৰ অক্সিজেন প্লেণ্টৰ বাহিৰত গৈ ভীৰ কৰে।
অক্সিজেন প্লেণ্টটো বৰ্তমান উত্তৰ প্ৰদেশ চৰকাৰে অধিগ্ৰহণ কৰিছে।
ৰোগীৰ আত্মীয়ৰ ভীৰ চম্ভালিবলৈ তাত আৰক্ষী মোতায়েন কৰিবলগা হৈছে।