মুখ্য মন্ত্ৰী সৰ্বানন্দ সোণোৱালে সোমবাৰে কয় যে চাওলুং ছ্যুকাফাৰ এটা প্ৰতিমূৰ্তি জনতা ভৱনত স্থাপন কৰা হ’ব আৰু সেইদৰে ডিব্ৰুগড় বিশ্ববিদ্যালয়ত স্বৰ্গদেউগৰাকীৰ নামত এখন আসন প্ৰতিষ্ঠা কৰা হ’ব।
অসম দিৱস উপলক্ষে যোৰহাটত এখন জনসভাত ভাষণ দি সোণোৱালে কয় যে অসমৰ বুৰঞ্জীত বৃহত্তৰ অসম গঠনত চাওলুং ছ্যুকাফাৰ বৰঙণি অতুলনীয়।
সোণোৱালে অসমৰ জনসাধাৰণক অখন শক্তিশালী অসম গঢ়াৰ বাবে ছ্যুকাফাৰ আদৰ্শ অনুসৰণ কৰিবলৈ আহ্বান জনায়।
‘’স্বৰ্গদেউ চাওলুং ছ্যুকাফা বৃহত্তৰ অসমীয়া সমাজৰ নিৰ্মাতা আছিল। তেওঁ তেওঁৰ সমন্বয়, একতা আৰু সম্প্ৰীতিৰ নীতিৰে এখন বিশাল আৰু সমৃদ্ধিশালী অসমৰ ভেটি গঢ়িছিল।
‘’প্ৰকৃততে, অসমীয়াই অতীতত তেওঁলোকৰ শত্ৰুৰ বিৰুদ্ধে প্ৰতিটো প্ৰত্যাহ্বানকে সফলতাৰে প্ৰতিৰোধ কৰিছিল আৰু ইয়াৰ পৰিচয়ৰ প্ৰতি অহা প্ৰতিটো ভাবুকিয়ে ইয়াত কোনো খোপনি পুতিব পৰা নাছিল,’’-ভাষণ প্ৰসংগত মুখ্য মন্ত্ৰীগৰাকীয়ে কয়।
সোণোৱালে যুৱ প্ৰজন্মক স্বৰ্গদেউ চাওলুং ছ্যুকাফাৰ জীৱন আৰু কৰ্মৰ বিষয়ে বিতং অধ্যয়নৰ বাবে আহ্বান জনায়।
‘’ভৱিষ্যতে স্বৰ্গদেউ চাওলুং ছ্যুকাফা সমন্বয় ক্ষেত্ৰৰ বিকাশৰ বাবে অধিক পদক্ষেপ গ্ৰহণ কৰা হ’ব,’’-মুখ্য মন্ত্ৰীয়ে কয়।
তেওঁ লগতে কয় যে ৪২গৰাকী আহোম স্বৰ্গদেউৰ চহকী স্মৃতি সংৰক্ষণৰ বাবে চৰাইদেওত স্বৰ্গদেউ চাওলুং ছ্যুকাফা সমন্বয় ক্ষেত্ৰ স্থাপনৰ উপৰি চৰাইদেও মৈদাম স্থলীক “বিশ্ব ঐতিহ্য ক্ষেত্ৰ’ৰ স্বীকৃতিৰ বাবে পদক্ষেপ চলাই থকা হৈছে।
মুখ্য মন্ত্ৰী সোণোৱালে লগতে ৰাজ্য চৰকাৰে স্বৰ্গদেউ চাওলুং ছ্যুকাফাৰ নামত ডিব্ৰুগড় বিশ্ববিদ্যালয়ত এখন আসন আৰু জনতা ভৱনৰ চৌহদত এটা বৃহৎ প্ৰতিমূৰ্তি স্থাপনৰ বাবে চলোৱা প্ৰচেষ্টাৰ বিষয়ে সদৰী কৰে।
ইয়াৰ পূৰ্বে পুৱাৰ ভাগত মুখ্য মন্ত্ৰী সোণোৱালে স্বৰ্গদেউ চাওলুং ছ্যুকাফা সমন্বয় ক্ষেত্ৰত স্বৰ্গদেউ চাওলুং ছ্যুকাফাৰ প্ৰতি শ্ৰদ্ধাঞ্জলি আগবঢ়ায়।