আজি ৰাতিপুৱা ৮.৩০ বজাত শিৱসাগৰৰ লক্ষ্মীনাথ বেজবৰুৱা উদ্যানৰ সমীপত সংঘটিত হোৱা এক পথ দূৰ্ঘটনাত শিৱসাগৰ মহাবিদ্যালয়ৰ এজন ছাত্ৰই কৰুণ মৃত্যুক সাৱতিব লগা হোৱা ঘটনাক কেন্দ্ৰ কৰি সমগ্ৰ অঞ্চলটোত শোকৰ ছাঁ পৰে।
ডিমৌ কুশল পথৰ নিৱাসী চন্দ্ৰশেখৰ দত্ত নামৰ যুৱক জনে ৰাতিপুৱা এ এছ-০৪এক্স-০৭৮০ নম্বৰৰ এখন স্কুটিৰে ডিমৌৰ পৰা শিৱসাগৰ মহাবিদ্যালয়লৈ আহি থকা অৱস্থাত দিখৌ দলংৰ সমীপত এখন চাইকেলেৰ সৈতে মুখামুখি সংঘৰ্ষ হয়।
মুখামুখি সংঘৰ্ষটোৰ ফলত গুৰুতৰভাৱে আহত স্কুটিত আহি থকা যুৱকজনক ততাতৈয়াকৈ কাষতে থকা আদিত্য নাৰ্চিং হোমলৈ নিয়া হয় যদিও চিকিৎসালয় কৰ্তৃপক্ষই যুৱকজনক চিকিৎসা নকৰাত শিৱসাগৰ অসামৰিক চিকিৎসালয়লৈ লৈ যোৱা হয়।
মুখেদি অত্যাধিক ৰক্তক্ষৰণ হোৱা যুৱকজনক চিকিৎসকে বচাবলৈ বহু চেষ্ঠা কৰে যদিও কিছু সময়ৰ পাছতে যুৱকজনৰ মৃত্যু হয়। চিকিৎসকে যুৱকজনক চিকিৎসা প্ৰদান কৰাত পলম হোৱা বাবেই বচাব পৰা নগ’ল বুলি উল্লেখ কৰে।
মৃত চন্দ্ৰশেখৰ দত্ত শিৱসাগৰ মহাবিদ্যালয়ৰ তৃতীয় ষন্মাসিষৰ ছাত্ৰ আছিল।
আনহাতে, শিৱসাগৰত ব্যক্তিগত নাৰ্চিং হোমাৰ দৌৰাত্ম দিনে দিনে বৃদ্ধি পাই আহিছে। যি সময়ত শিৱসাগৰ জিলা প্ৰশাসনে ব্যক্তিগত নাৰ্চিং হোমত নিশা জৰুৰী কালীন সেৱা পুনৰ খোলাৰ চিন্তা-চৰ্চা কৰি আছে, তেনে সময়তে ৰাতিপুৱা এজন আঘাতপ্ৰাপ্ত যুৱকক আদিত্য নামৰ ব্যক্তিগত চিকিৎসালয় খনে চিকিৎসা নকৰা কাৰ্যক ধিক্কাৰ দিছে শিৱসাগৰবাসীয়ে।
ক্ষোভিত স্থানীয় জনসাধাৰণে শিৱসাগৰ জিলা প্ৰশাসনক আদিত্য নামৰ ব্যক্তিগত নাৰ্চিং হোম খনৰ ওপৰত উচিত ব্যৱস্থা গ্ৰহণ কৰিবলৈ দাবী জনাইছে।