আগন্তুক লোকসভা নিৰ্বাচনৰ বাবে শিৱসাগৰ জিলাত বলবৎ হোৱা নিৰ্বাচনী আচৰণ বিধিৰ বিষয়ে অৱগত কৰাৰ উদ্দেশ্যে বিভিন্ন ৰাজনৈতিক দলৰ সৈতে সোমবাৰে জিলা উপায়ুক্ত ডাঃ এছ লক্ষ্মণন এক বৈঠকত মিলিত হয়।
উপায়ুক্ত কাৰ্যালয়ৰ চুকাফা সভা কক্ষত অনুষ্ঠিত উক্ত সভাত উপায়ুক্ত গৰাকীয়ে উপস্থিত সকলোকে নিৰ্বাচনী আচৰণ বিধিৰ বিষয়ে বিশদভাৱে জনোৱাৰ লগতে এই সময়ত ৰাজনৈতিক দল সমূহে পালন কৰিব লগীয়া দায়িত্ব সম্পৰ্কে আলোচনা কৰে।
ৰাজনৈতিক দল সমূহে সভা অনুষ্ঠিত কৰিবৰ বাবে অনলাইন যোগে ‘সুবিধা’ নামৰ এপৰ জৰিয়তে কৰিব পাৰিব বুলি জানিবলৈ দিয়ে। তদুপৰি কয় যে কোনো চৰকাৰী ভৱন, সম্পত্তি, অনুষ্ঠান, বিদ্যুতৰ খুটা, বিদ্যালয় বা দেৱালত নিৰ্বাচনী প্ৰচাৰ সম্পৰ্কীয় বেনাৰ বা পোষ্টাৰ লগাব নোৱাৰিব আৰু কোনো চৰকাৰী অনুষ্ঠান প্ৰতিষ্ঠানত বা চৌহদত সভা অনুষ্ঠিত কৰিব নোৱাৰিব।
আগন্তুক লোকসভা নিৰ্বাচন স্বচ্ছ, নিকা আৰু শান্তিপূৰ্ণ ভাৱে অনুষ্ঠিত কৰাৰ বাবে সকলো ৰাজনৈতিক দলৰ পৰা পূৰ্ণ সহযোগিতা কামনা কৰে।
আনহাতে বৈঠকত উপস্থিত থাকি জিলা আৰক্ষী অধীক্ষক অমিতাভ সিনহাই সকলোকে চ’ছিয়েল মিডিয়াত কোনোধৰণৰ প্ৰৰোচনামূলক, বিভেদকামী, সমাজৰ শান্তি শৃংখলা পৰিবেশ নষ্ট কৰিব পৰা মন্তব্য প্ৰদান কৰাৰ পৰা বিৰত থাকিবলৈ আহ্বান জনায়।
যদি কোনো ৰাজনৈতিক দলে নিৰ্বাচনী প্ৰচাৰ চলাবলৈ বিশিষ্ট প্ৰচাৰকক আমন্ত্ৰণ কৰে তেতিয়া আগতীয়াকৈ আৰক্ষী বিভাগক অৱগত কৰিবলৈ আহ্বান জনায় জিলা আৰক্ষী অধীক্ষক গৰাকীয়ে।
বৈঠকত অতিৰিক্ত উপায়ুক্ত মুন বৰুৱা, নিৰ্বাচনী বিষয়া জগদীশ ব্ৰহ্ম, জিলা তথ্য প্ৰযুক্তি বিষয়া কামৰুজ জামান, বিত্ত আৰু গাণিতিক বিষয়া শিবু বনিক, সহকাৰী আয়ুক্তসকলৰ লগতে সকলো ৰাজনৈতিক দলৰ প্ৰতিনিধি উপস্থিত থাকে।