চৰকাৰী কাম-কাজৰ গতি ত্বৰান্বিত আৰু ৰাজহুৱা সেৱা প্ৰদানৰ জটিলতা দূৰ কৰাৰ অৰ্থে শিৱসাগৰ জিলা উপায়ুক্তৰ কাৰ্যালয়ত এতিয়াৰ পৰা পৰম্পৰাগত ফাইলৰ পৰিৱৰ্তে কাম-কাজ হ’ব ইলেক্ট্ৰনিক মাধ্যমেৰে।
কাৰ্যালয়টোত কাগজৰ ব্যৱহাৰ বন্ধ কৰাৰ লক্ষ্যৰে যোৱা ৩১ আগষ্ট অৰ্থাৎ শনিবাৰে উজনি অসমৰ মাণ্ডলীক আয়ুক্ত জুলী সোণোৱালে শিৱসাগৰ জিলা উপায়ুক্ত কাৰ্যালয়ত ই-অফিচৰ শুভাৰম্ভ কৰে।
জিলাস্তৰত গ্ৰহণ কৰা এই পদক্ষেপ অসমৰ ভিতৰতে প্ৰথম।
এই সন্দৰ্ভত উপায়ুক্ত কাৰ্যালয়ৰ চ্যুকাফা সভাকক্ষত এখন সভা অনুষ্ঠিত হয়। সভাত মাণ্ডলীক আয়ুক্ত গৰাকীয়ে জিলা প্ৰশাসনে গ্ৰহণ কৰা পদক্ষেপৰ শলাগ লোৱাৰ লগতে এই পদক্ষেপৰ দ্বাৰা লাভ কৰিব পৰা সুবিধা সমূহৰ বিষয়ে আলোচনা কৰে।
উপায়ুক্ত কাৰ্যালয়ৰ পিছত জিলাখনৰ আৰু চাৰিটা কাৰ্যালয় ক্ৰমে, আৰক্ষী অধীক্ষকৰ কাৰ্যালয়, পৰিবহণ বিষয়াৰ কাৰ্যালয়, জিলা কৃষি বিভাগ আৰু জিলা পৰিষদত এই ব্যৱস্থা সন্নিবিষ্ট কৰা হ’ব বুলিও তেওঁ সদৰি কৰে।
সভাত উপস্থিত থাকি উপায়ুক্ত ডাঃ এছ লক্ষ্মণনে ই-অফিচৰ সুবিধা সমূহ উল্লেখ কৰি কয় যে এই পদ্ধতিত ফাইলৰ ব্যৱস্থাপনাৰ ক্ষেত্ৰত কোনো ব্যয় বহন কৰিব নালাগে। লগতে এই মাধ্যমৰ ক্ষেত্ৰত ফাইল সংৰক্ষণ কৰাৰ বাবে অতিৰিক্ত ঠাইৰ বাবে চিন্তা কৰাৰো প্ৰয়োজনীয়তা নাই বুলিও তেওঁ কয়।
উল্লেখ্য যে ই-অফিচ সফল ভাৱে ৰূপায়ণ কৰাৰ বাবে সকলো সংশ্লিষ্ট বিষয়া-কৰ্মচাৰীৰ প্ৰয়োজনীয় কাৰিকৰী জ্ঞান, উদ্যম আৰু নিষ্ঠাৰ প্ৰয়োজন বুলি উপায়ুক্ত গৰাকীয়ে মন্তব্য কৰে।
ই-অফিচৰ সফল ৰূপায়ণৰ দ্বাৰা তেওঁ সকলোকে উপায়ুক্ত কাৰ্যালয়ক জিলাৰ ভিতৰতেই নহয়, ৰাজ্যৰ ভিতৰত অনুকৰণীয় উদাহৰণ ৰূপে প্ৰতিষ্ঠা কৰাৰ বাবে আহ্বান জনায়।
এই ক্ষেত্ৰত তেওঁ সকলো প্ৰকাৰৰ সহযোগিতা আগবঢ়োৱাৰ প্ৰতিশ্ৰুতি প্ৰদান কৰে।
সভাত তেওঁ উপস্থিত সকলোকে ই-অফিচ ব্যৱস্থাত কাম-কাজ কেনেকৈ সম্পন্ন কৰা হয় সেই বিষয়ে বিস্তৃতভাৱে বুজাই দিয়ে।
উল্লেখযোগ্য যে ই-অফিচ পদ্ধতি ৰাষ্ট্ৰীয় তথ্য বিজ্ঞান কেন্দ্ৰ (National Informatics Centre) -ৰ দ্বাৰা উন্নীত আৰু পৰিকল্পনা কৰা হৈছে।
আজিৰ সভাত আৰক্ষী অধীক্ষক অমিতাভ সিনহা, জিলা উন্নয়ন আয়ুক্ত জোনমণি সোণোৱাল, অতিৰিক্ত উপায়ুক্ত দ্বয় বিদিত দাস আৰু দিলীপ তেৰাং, ই-অফিচৰ প্ৰকল্প প্ৰবন্ধক শ্বৰীক খান, NIC -ৰ জিলা তথ্য বিজ্ঞান বিষয়া কামৰুজ জামান, সহকাৰী আয়ুক্ত দ্বয় গৌৰীপ্ৰিয়া দেউৰী আৰু মনালি ৰজকৰ উপৰি উপায়ুক্ত কাৰ্যালয়ৰ ভালেসংখ্যক বিষয়া-কৰ্মচাৰী উপস্থিত থাকে।