শিৱসাগৰৰ অন্যতম শিক্ষানুষ্ঠান শংকৰদেৱ শিশু নিকেতনত শিক্ষকৰ দ্বাৰা শিশু ছাত্ৰক শাৰীৰিক অত্যাচাৰৰ এক ঘটনা পোহৰলৈ আহিছে। এই সন্দৰ্ভত ভুক্তভোগী ছাত্ৰৰ অভিভাৱকে জিলা উপায়ুক্তক ঘটনাৰ উচিত বিচাৰৰ বাবে লিখিত অভিযোগ দাখিল কৰিছে।
ঘটনাৰ বিৱৰণী মতে, শিৱসাগৰৰ মেলাচকৰত থকা শংকৰদেৱ শিশু নিকেটনত দ্বিতীয় শ্ৰেণীত অধ্যয়নৰত শিৰুমণি দাসক শিক্ষক অমৰজ্যোতি গগৈয়ে বিদ্যালয় ছুটীৰ সময়ত বিদ্যালয়খনৰ প্ৰাৰ্থনা গৃহত বিনাকাৰণত অতি বেয়াকৈ ভৰি আৰু গালত প্ৰহাৰ কৰাৰ লগতে গালি গালাজ কৰে।
শিৱসাগৰৰ পলশনি গোহাঁই গাঁৱৰ ছাত্ৰজনৰ পিতৃ যোগেশ দাসে জনোৱা মতে বিদ্যালয়খনত অধ্যায়ণ কৰা তেওঁৰ ডাঙৰ পুত্ৰকো উক্ত শিক্ষকজনে প্ৰহাৰ কৰি গুৰুত্বভাৱে আঘাত কৰিছিল।
আনহাতে যোগেশ দাসে জনোৱা মতে তেওঁৰ কনিষ্ঠ পুত্ৰৰ বহুদিনৰ পৰা স্নায়ুজনিত কাৰণত চিকিৎসা কৰি থকাৰ লগতে মূৰৰ এক জটিল অস্ত্ৰোপচাৰ কৰোৱা হৈছিল। এই সন্দৰ্ভত বিদ্যালয় কৃতৃপৰ্ক্ষক জনোৱা হৈছিল বুলি তেওঁ কয়।
কিন্তু ইয়াৰ পিছতো বিদ্যালয় কৰ্তৃপক্ষই কোনো ব্যৱস্থা গ্ৰহণ নকৰাত উপায়ন্তৰ হৈ যোগেশ দাসে আজি পুত্ৰৰ নিৰাপত্তা সুনিশ্চিত কৰিবলৈ অনুৰোধ জনাই শিৱসাগৰ জিলা উপায়ুক্তক লিখিত অভিযোগ দাখিল কৰে।
