মিছা প্ৰতিশ্ৰুতিৰে উন্নয়ণৰ ঢাকঢোল বজোৱা শাসনাধিষ্ঠ বিজেপি চৰকাৰৰ ফোপোলা স্বৰূপ আজি প্ৰকাশ হ’ল শিৱসাগৰ চহৰৰ মাজমজিয়াত।
ৰাতিপুৱা অহা এজাক বৰষুণতেই শিৱসাগৰ চহৰৰ বিভিন্ন অঞ্চল জলমগ্ন হৈ পৰে।
শিৱসাগৰ চহৰৰ দৌলমুখ চাৰিআলি, হস্পিতেল ৰোড, টেম্পল ৰোড, আমোলাপট্টি, মুক্তিনাথ চাৰিআলি, কেন্দ্ৰীয় বজাৰ, বৰ্ডিং ৰোড, পুৰণা চক বজাৰকে ধৰি বিভিন্ন অঞ্চল বৰষুণৰ পানীয়ে বুৰায় পেলায়।
পাঁচটা বছৰে বিজেপিৰ শাসনত থকা শিৱসাগৰ পৌৰসভাই চহৰত উন্নয়ণৰ নামত বিভিন্ন আঁচনি গ্ৰহণ কৰিছিল যদিও সেই আঁচনি কেৱল কাগজে পত্ৰতে পৰি ৰ’ল।
২০১৮ চনতেই শিৱসাগৰ চহৰৰ সৌন্দৰ্যবৰ্ধন আৰু আন্তঃগাঠনি উন্নয়ণৰ বাবে চিটি ইনফ্ৰাচটক্সাৰ ডেভেলপমেন্ট ফাণ্ডৰ জৰিয়তে ১০০ কোটি টকা আবন্টন পোৱা বুলি ঘোষণা কৰিছিল পৌৰসভা আৰু জিলা প্ৰশাসনে। সেই টকাৰ এটা অংশৰে শিৱসাগৰ চহৰৰ নলা নৰ্দমাসমুহ বিজ্ঞান সন্মতভাৱে বনোৱাৰ এক অভিলাষী আঁচনি ঘোষণা কৰিছিল পৌৰসভাই।
কিন্তু পুঁজি আবন্টন পোৱাৰ দুটা বছৰৰ পাছতো চহৰৰ নলা নৰ্দমা সমুহ নিৰ্মাণ কৰাৰ কোনো কামেই হাতত নললে শিৱসাগৰ পৌৰসভাই। যাৰবাবে এজাক বৰষুণতেই জলমগ্ন হৈ পৰে শিৱসাগৰ চহৰৰ বিভিন্ন অঞ্চল।
ইপিনে, কিছুদিন পূৰ্বে কাৰ্যকাল শেষ হোৱা বিজেপি শাসনাধিষ্ঠ পৌৰ সমিতিয়ে শিৱসাগৰৰ উন্নয়ণৰ নামত অহা পুঁজিৰ হিচাপ ৰাজহুৱা কৰিবলৈ দাবী জনায় একাংশ সচেতন ব্যক্তিয়ে।
