যোৱা তিনি মাহত জাপানীজ এনকেফেলাইটিছৰ ফলত যোৰহাট জিলাত ৮ গৰাকী লোকে প্ৰাণ হেৰৱাইছে, ইয়াৰে ভিতৰত ৬টি শিশু আছে।
যোৱা এপ্ৰিলৰ পৰা হাস্পিতালখনৰ শিশুৰোগ বিভাগত ৬টি শিশুৰ মৃত্যু হোৱা বুলি উল্লেখ কৰি যোৰহাট মেডিকেল কলেজৰ উপ-অধীক্ষক ডাঃ নিলোৎপল ভট্টচাৰ্য্যই কয় যে ইয়াৰে এপ্ৰিল আৰু মে’ত ক্ৰমে এটিকৈ আৰু জুনত ৪টি শিশুৰ মৃত্যু হয়।
‘বৰ্তমান হস্পিতালখনত জ্বৰত আক্ৰান্ত ৫ গৰাকী প্ৰাপ্তবয়স্ক লোক ভৰ্তি হৈ আছে, ইয়াৰে ৪ গৰাকীৰ দেহত জাপানীজ এনকেফেলাইটিছ (জে ই)আছে। শিশুৰোগ বিভাগত দেহত জ্বৰ আৰু জে ইৰ লক্ষণ থকা ৭টি শিশুৰ দুটিৰ দেহত জাপানীজ এনকেফেলাইটিছ থকাটো নিশ্চিত।‘ তেওঁ কয়।
ৰোগীকেইজন মাজুলী, শিৱসাগৰ, গোলাঘাট আৰু যোৰহাট জিলাৰ বাসিন্দা। এইবছৰৰ জানুৱাৰিৰ পৰা হস্পিতালখনত এক্যুট এনকেফেলাইটিছ চিণ্ড্ৰমৰ ৪৩টা কেছ ধৰা পৰিছে অৱশ্যে ইয়াৰ ফলত কাৰো মৃত্যু হোৱা নাই।
আনহাতে ইয়াৰ উপৰি জিলাখনৰ নকছাৰি দেবেৰাবপৰাৰ নুৰী খাতুন (১৮) আৰু কাছগৰাইৰ পবিত্ৰ (৫৮) নামৰ আন দুজন লোকৰ ক্ৰমে যোৱা মে’ আৰু জুন মাহত মৃত্যু হৈছিল। অৱশ্যে উক্ত লোককেইজনৰ যোৰহাট মেডিকেল কলেজত মৃত্যু হোৱা নাছিল।
