উত্তৰ পূৰ্বাঞ্চলৰ উচ্চ শিক্ষাৰ প্ৰতিষ্ঠান গুৱাহাটীৰ আজাৰাস্থিত গিৰিজানন্দ চৌধুৰী ইনষ্টিটিউট অৱ ফাৰ্মাছিউটিকেল চায়েন্স(GIPS)ৰ প্ৰতিষ্ঠান চৌহদত সৰ্বভাৰতীয় কাৰিকৰী শিক্ষা পৰিষদ(AICTE)ৰ দ্বাৰা প্ৰায়োজিত এখনি অল্পকালীন শিক্ষক-বিকাশ আৰু শিকন অনুষ্ঠান( Short term Training Program) এটিৰ সফল সামৰণি পৰে।
যোৱা ২০জুন ২০২২ৰ পৰা ২৫ জুনলৈ অনুষ্ঠিত হোৱা শিক্ষক-বিকাশ আৰু শিকন অনুষ্ঠানটিৰ মূল বিষয়বস্তু আছিল” গৱেষণা আৰু গৱেষণা পত্ৰসমূহৰ প্ৰকাশৰ ক্ষেত্ৰত এজন শিক্ষকৰ দ্বাৰা নৈতিক শুদ্ধতা আৰু নীতিশিক্ষাসমূহক মান্যতা প্ৰদান কৰা”।
প্ৰথম দিনৰ কাৰ্যসূচী হিচাপে প্ৰতিষ্ঠান খনিৰ অধ্যক্ষ তথা অনুষ্ঠানটিৰ এজন মূল ব্যক্তি হিচাপে ড: গৌৰাংগ দাস দেৱে উপস্থিত সকলোকে আদৰণি সম্ভাষণ জনায় ইয়াৰ পিছতেই গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকনল’জী প্ৰতিষ্ঠানৰ অধ্যক্ষ ড: থুলেশ্বৰ নাথে আৰম্ভণি ভাষণ আগবঢ়ায়।
অনুষ্ঠানটিৰ মুখ্য উদ্দেশ্য সমূহ ব্যাখ্যা কৰাৰ লগতে উপস্থিত সকলোকে আকৌ এবাৰ অভিবাদন জনায় প্ৰতিষ্ঠানখনৰ জ্যেষ্ঠ অধ্যাপক ড: ডামিকী লালুৱে।
সৰ্বমুঠ ১৭খন কাৰিকৰী বৈঠক অনূষ্ঠিত হোৱা অনুষ্ঠানটিত বিজ্ঞান আৰু প্ৰযুক্তিবিদ্যাৰ ক্ষেত্ৰৰ বিভিন্ন দিশৰ লগত জড়িত কেইবাজনো ব্যক্তিয়ে অনুষ্ঠানটিৰ শিৰোনামটিৰ লগত সংগতি ৰাখি বিশ্লেষণাত্মক তথ্য আগবঢ়ায়। উপস্থিত থকা বিশেষ ব্যক্তিসকলৰ ভিতৰত ডিব্ৰুগড় বিশ্ববিদ্যালয়ৰ প্ৰাক্তন উপাচাৰ্য্য প্ৰফেছাৰ অলক কুমাৰ বুঢ়াগোহাঁই,অসম কৃষি বিশ্ববিদ্যালয়ৰ প্ৰফেছাৰ প্ৰবোধ বৰা, প্ৰফেছাৰ প্ৰীতম মোহন। ভাৰতীয় প্ৰযুক্তিবিদ্যা প্ৰতিষ্ঠান গুৱাহাটীৰ অজয়কুমাৰ বি. কুনুমকাঢ়া,বিশ্বৰ আগশাৰীৰ বৈজ্ঞানিক ড: ফায়াজ্জুদিন আহমেদ, নাইপাৰ গুৱাহাটীৰ ড:সুভম বেনাৰ্জী , গুৱাহাটী বিশ্ববিদ্যালয়ৰ ড:প্ৰাঞ্জল শইকীয়া, যোৰহাটস্থিত CSIR-NETৰ মুখ্য বিজ্ঞানী ড: অৰ্চনা মণি দাস, গুৱাহাটী বিশ্ববিদ্যালয়ৰ ড: সুভাষ মেধি, মেঘালয়ৰ মেডিকেল ৰাইটাৰ ইমানকুলিছ ৰানী, বিউ্যৰ’ অৱ পেটেণ্ট আৰু ট্ৰেডমাৰ্ক, গুৱাহাটীৰ নিৰ্দেশক প্ৰদীপ্ত কে. বগছি আদি বিশিষ্ট ব্যক্তিসকল।
উপস্থিত থকা ব্যক্তি সকলৰ মাজত গৱেষণা আৰু অনুসন্ধানৰ ক্ষেত্ৰত পৰিসংখ্যা বিজ্ঞানৰ সঠিক ব্যৱহাৰ, গৱেষণা পত্ৰসমূহৰ প্ৰকাশৰ ক্ষেত্ৰত নৈতিক শুদ্ধতাৰ ওপৰত গুৰুত্ব প্ৰদান, গৱেষণাৰ অৱকাশ থকা ফাৰ্মাচী তথা ৰাসায়নিক আৰু প্ৰাকৃতিক বস্তুবোৰৰ ওপৰত বিশেষ গুৰুত্ব আৰোপ প্ৰদান কৰাকে ধৰি গৱেষণাৰ লগত জড়িত বিভিন্ন দিশ সমূহৰ ওপৰত গভীৰ আলোচনা তথা বিশদভাৱে পৰ্যালোচনা অনুষ্ঠিত হয়।
উত্তৰ পূৰ্বাঞ্চলৰ কেইবাজনো উচ্চ পৰ্যায়ৰ বৈজ্ঞানিক, গৱেষক, অধ্যাপক তথা উদ্যৌগিকে অংশগ্ৰহণ কৰা অনুষ্ঠানটিত শেষৰ দিনৰ কাৰ্যসূচী হিচাপে অংশগ্ৰহণকাৰীসকলৰ মাজত প্ৰকল্প নিৰীক্ষণ কমিটি(PMC) দ্বাৰা এটি মূল্যাংকন পৰীক্ষাৰো ব্যৱস্থা কৰা হয়।সদৌশেষত অনুষ্ঠানটিৰ মুখ্য আহ্বায়কৰ দায়িত্বত থকা ড:ডামিকী লালুৱে সকলোকে উদ্দেশ্যি শলাগৰ শৰাই আগবঢ়োৱাৰ লগতে সকলোৰে সহায় সহযোগিতাৰ বাবে আন্তৰিক কৃতজ্ঞতা জ্ঞাপন কৰে।
