অন্ধ্ৰ প্ৰদেশত আন এক বৃহৎ বিপৰ্যয়ৰ সন্মুখীন হৈছে মাওবাদী। মাওবাদী কেন্দ্ৰীয় সমিতিৰ সদস্য মাদভি হিদমা, তেওঁৰ পত্নী আৰু তেওঁলোকৰ চাৰিজন সহযোগী নিৰাপত্তাৰক্ষীৰ সৈতে হোৱা এনকাউণ্টাৰত নিহত হৈছে।
মঙলবাৰে পুৱা অন্ধ্ৰপ্ৰদেশৰ আল্লুৰি সীতাৰামা ৰাজু জিলাৰ মেৰেডুমিলিৰ বনাঞ্চলত নিৰাপত্তা বাহিনীয়ে তালাচী অভিযান আৰম্ভ কৰে। সেই সময়ত নিৰাপত্তাৰক্ষীৰ সৈতে হোৱা সংঘৰ্ষত ৬জন মাওবাদী নিহত হয়। সূত্ৰ অনুসৰি নিৰাপত্তা বাহিনীয়ে এতিয়াও অঞ্চলটোত তালাচী অভিযান অব্যাহত ৰাখিছে।
সূত্ৰৰ পৰা জানিব পৰা মতে, কেইবাদিনো ধৰি হিদমাক বিচাৰি নিৰাপত্তা বাহিনীয়ে তালাচী অভিযান আৰম্ভ কৰিছিল। তেওঁৰ বিৰুদ্ধে কমেও ২৬টা সশস্ত্ৰ আক্ৰমণৰ অভিযোগ আছে। ইয়াৰ উপৰিও ২০১০ চনত দান্তেৱাড়া আক্ৰমণ, ২০১৩ চনত ঝিৰাম উপত্যকাৰ আক্ৰমণ আৰু ২০২১ চনত চুকমা-বিজাপুৰ আক্ৰমণত হিদমাই মুখ্য ভূমিকা পালন কৰিছিল।
হিদমা প্ৰথমে পিপলছ লিবাৰেচন গেৰিলা আৰ্মীৰ নেতা আছিল। তেওঁ আছিল মাওবাদীৰ কেন্দ্ৰীয় সমিতিৰ আটাইতকৈ কম বয়সীয়া সদস্য। এই কমিটীত যোগদান কৰা বস্তাৰ অঞ্চলৰ একমাত্ৰ জনজাতীয় সদস্য। এটা সময়ত হিদমাৰ মূৰৰ দাম ৫০ লাখ টকা উঠিছিল। সূত্ৰ অনুসৰি এনকাউণ্টাৰত কেৱল হিদমাই নহয় তেওঁৰ পত্নী ৰাজে ওৰফে ৰাজাক্কাও নিহত হৈছে।
আনহাতে, ছত্তীশগড়ৰ চুকমা জিলাতো নিৰাপত্তা বাহিনীৰ বাবে আহিছে বৃহৎ সফলতা। এনকাউণ্টাৰত নিহত হৈছে এজন মাওবাদী। মঙলবাৰে পুৱা এৰাবোৰ আৰক্ষী থানাৰ সমীপৰ বনাঞ্চলৰ পৰা বিক্ষিপ্তভাৱে গুলীচালনাৰ শব্দ লাভ কৰে আৰক্ষীয়ে। সেই তথ্যৰ ভিত্তিত কেন্দ্ৰীয় নিৰাপত্তা বাহিনীয়ে তালাচী অভিযান আৰম্ভ কৰে। নিৰাপত্তাৰক্ষীয়ে বনাঞ্চলত প্ৰৱেশ কৰাৰ লগে লগে মাওবাদীয়ে গুলীচালনা আৰম্ভ কৰে। নিৰাপত্তা বাহিনীয়েও প্ৰত্যুত্তৰত গুলীচালনা কৰে। ফলত মাওবাদীজন নিহত হয়।
ইয়াৰ পূর্বে ১১ নৱেম্বৰত অন্ধ্র প্রদেশত নিৰাপত্তাৰক্ষীৰ সৈতে হোৱা এক এনকাউণ্টাৰত ৬জন মাওবাদী নিহত হৈছিল৷ অন্ধ্ৰ প্ৰদেশ, ছত্তীশগড় আৰু তেলেংগানাৰ কেইবাঠাইতো মাওবাদী কাৰ্যকলাপ বৃদ্ধি পাইছে। তেওঁলোকক নিৰ্মূল কৰিবলৈ নিৰাপত্তা বাহিনীয়ে অবিৰতভাৱে তালাচী অভিযান চলাই আছে।
