নৱবৰ্ষৰ প্ৰথম দিনাই ঝাৰখণ্ডৰ জামছেদপুৰত সংঘটিত হৈছে এক মৰ্মান্তিক ঘটনা। পৰিয়ালৰ বাধা আওকাণ কৰি ফুৰিবলৈ গৈ এক ভয়াৱহ পথ দুৰ্ঘটনাত ৬ যুৱকৰ মৃত্যু হোৱাৰ লগতে দুজন আহত হৈছে।
জামছেদপুৰৰ বিস্তুপুৰ থানা এলেকাত সংঘটিত হয় এই দুৰ্ঘটনা। জামছেদপুৰৰ এগৰাকী জ্যেষ্ঠ আৰক্ষী বিষয়াই জানিবলৈ দিয়া মতে, ৮ জন যুৱকে যাত্ৰা কৰা বাহনখন প্ৰকৃততে আছিল ৫ জনীয়া আসনৰ।
গাড়ীখনে প্ৰথমে ৰোড ডিভাইডাৰত খুন্দা মাৰে আৰু তাৰ পিছতে ওচৰৰ এটা খুঁটাত খুন্দা মাৰে বুলি জানিবলৈ দিয়ে আৰক্ষী বিষয়াজনে। এই ঘটনাত পাঁচজনৰ থিতাতে মৃত্যু হয়।
আনহাতে আন তিনিজনক চিকিৎসালয়লৈ লৈ যোৱা হয়। চিকিৎসালয়ত মৃত্যু হয় আন এজন ব্যক্তিৰ। আহত বাকী দুজন যুৱক সম্প্ৰতি চিকিৎসাধীন হৈ আছে বুলি আৰক্ষী বিষয়াজনে জানিবলৈ দিয়ে।
গাড়ীখন তীব্ৰ বেগেৰে গৈ থকাৰ বাবেই এই ভয়ংকৰ দুৰ্ঘটনা সংঘটিত হয় বুলি বিষয়াজনে সদৰী কৰে। দুৰ্ঘটনাৰ পিছত গাড়ীৰ ভিতৰতে আবদ্ধ যুৱককেইজনক গেছ কাটাৰ ব্যৱহাৰ কৰি উলিয়াই অনা হয় বুলি লগতে তেওঁ উল্লেখ কৰে।
দুৰ্ঘটনাত পতিত আটাইকেইজন যুৱকেই ছেৰাইকেলা-খৰছাৱান জিলাৰ আৰ আই টি থানা এলেকাৰ বাসিন্দা বুলি জানি জানিব পৰা গৈছে।
ইফালে প্ৰকাশিত খবৰ অনুসৰি, ৩১ ডিচেম্বৰৰ গভীৰ নিশালৈকে পাৰ্টি কৰিছিল যুৱককেইজনে। ইয়াৰ পিছত ১ জানুৱাৰীৰ পুৱা প্ৰায় ৪:৩০ বজাত জামছেদপুৰলৈ ৰাওনা হৈছিল তেওঁলোক।
যুৱককেইজনৰ পৰিয়ালে তেওঁলোকক ভ্ৰমণলৈ নাযাবলৈ বাৰে বাৰে কোৱাৰ পিছতো তেওঁলোকে এই বাধা নামানি ওলাই জোৱা বুলি জানিব পৰা গৈছে।
ঘটনা সন্দৰ্ভত ঝাৰখণ্ডৰ মুখ্যমন্ত্ৰী হেমন্ত সোৰেনে প্ৰতিক্ৰিয়া প্ৰকাশ কৰিছে। পথ দুৰ্ঘটনাটোক লৈ তেওঁ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জনায় আৰু আহতসকলৰ আশু আৰোগ্য কামনা কৰে।
