যাত্ৰী ভৰ্তি ট্ৰেভেলাৰ আৰু এখন ট্ৰাকৰ মাজত মুখামুখি সংঘৰ্ষত ৬ জন লোকৰ মৃত্যু ঘটিছে। গুৰুতৰভাৱে আহত হৈছে কেইবাজনো লোক। মৃতসকলৰ ভিতৰত ট্ৰেভেলাৰৰ চালকজনো আছে।
দেওবাৰে সন্ধিয়া গুৱাহাটী-সোনাপুৰ ৰাষ্ট্ৰীয় ঘাইপথৰ ক্ষেত্ৰীৰ নলগেদ্ৰাত সংঘটিত হয় এই দুৰ্ঘটনা। আৰক্ষীয়ে ট্ৰাকখন জব্দ কৰিছে। তদন্ত আৰম্ভ কৰা হৈছে।
আৰক্ষী আৰু স্থানীয় ৰাইজৰ মতে, নগাঁৱৰ পৰা গুৱাহাটী অভিমুখে গৈ আছিল ২৬ জনী যাত্ৰী কঢ়িওৱা ট্ৰেভেলাৰখন। হঠাৎ নলাগেদ্ৰা অঞ্চলৰ ৰাষ্ট্ৰীয় ঘাইপথৰ গাঁতত পৰিল। জানিব পৰা মতে, সেই সময়ত ট্ৰেভেলাৰৰ এটা টায়াৰ ফাটি গৈছিল। ইয়াৰ বাবেই চালকজনে গাড়ীখনৰ ওপৰত নিয়ন্ত্ৰণ হেৰুৱাই পেলায়।
নিয়ন্ত্ৰণ হেৰুৱাই ট্ৰেভেলাৰখনে ৰোড ডিভাইডাৰ পাৰ হৈ কাষৰ ৰাস্তাত উঠে। সেই সময়ত বিপৰীত দিশৰ পৰা এখন ট্ৰাক আহি আছিল। ট্ৰেভেলাৰ আৰু ট্ৰাকখনৰ মুখামুখি সংঘৰ্ষ ঘটে। সংঘৰ্ষ ইমানেই ভয়াৱহ আছিল যে ট্ৰেভেলাৰৰ সন্মুখভাগ চূৰ্ণ-বিচুৰ্ণ হৈ পৰে।
দুৰ্ঘটনাটোৰ পিছতে ট্ৰেভেলাৰৰ কেইবাজনো যাত্ৰী আহত হয়। স্থানীয় ৰাইজে প্ৰথমে উদ্ধাৰৰ কাম হাতত লৈছিল। আহতসকলক ৰক্তাক্ত অৱস্থাত উদ্ধাৰ কৰি স্থানীয় চিকিৎসালয়লৈ লৈ যোৱা হয়। চিকিৎসকে তাত ৬ জন লোকক মৃত বুলি ঘোষণা কৰে। বাকীসকল চিকিৎসাধীন হৈ আছে। ক্ষেত্ৰী থানাৰ আৰক্ষীয়ে তথ্য লাভ কৰাৰ পাছতে সেই স্থানত উপস্থিত হয়।
দুৰ্ঘটনাটোত মৃত্যু হোৱা ৬ জন লোকৰ ভিতৰত দুজনৰ পৰিচয় উদ্ধাৰ হৈছে। তেওঁলোক হৈছে গোপাল দাস, জ্যোতিকা ৰংহাং। গুৰুতৰভাৱে আহতসকলৰ ভিতৰত আছে মুজাহিদুল ইছলাম,জিয়াৰুল ইছলাম, দীপজ্যোতি নাথ আৰু অসীম কোচ।
এই দুৰ্ঘটনা কেনেদৰে সংঘটিত হয় আৰক্ষীয়ে তাৰ তদন্ত অব্যাহত ৰাখিছে। প্ৰথম অৱস্থাত টায়াৰ ফাটি যোৱাটোৱেই দুৰ্ঘটনাৰ অন্যতম কাৰণ বুলি ধাৰণা কৰা হৈছে। অৱশ্যে তদন্ত সম্পূৰ্ণ হোৱাৰ পিছতহে সমগ্ৰ বিষয়টো নিশ্চিতভাৱে জানিব পৰা যাব বুলি আৰক্ষীয়ে জনাইছে।
