New species of miniature frog discovered মেক্সিকোত ৫০ পইচাৰ মুদ্ৰাতকৈয়ো সৰু বিশ্বৰ আটাইতকৈ ক্ষুদ্ৰাকৃতিৰ ভেকুলী আৱিষ্কাৰ

মেক্সিকোত আৱিষ্কাৰ হৈছে বিশ্বৰ আটাইতকৈ ক্ষুদ্ৰাকৃতিৰ ভেকুলীৰ প্ৰজাতি৷ এই ভেকুলীবোৰ ইমানেই সৰু যে সেইবোৰক ব্ৰিটিছ ৫০ পইচাৰ মুদ্ৰাৰ ওপৰত থলেও বহু ঠাই বাকী থাকে।

পৃথিৱীৰ আটাইতকৈ সৰু ভেকুলী হিচাবে পৰিগণিত হোৱা এই ভেকুলীবোৰৰ আকাৰ প্ৰায় ১৫ মিলিমিটাৰ (০.৬ ইঞ্চি) ।

শেহতীয়াকৈ আৱিষ্কাৰ হোৱা অতি ক্ষুদ্ৰাকৃতিৰ ভেকুলীবোৰে অৰণ্যৰ আন্ধাৰ এলেকাৰ লগতে পাতৰ আৱৰ্জনাৰ মাজত বাস কৰে ৷ দেখিবলৈ অতি সৰু হোৱাৰ বাবেই এনে ভেকুলীবোৰ সহজে মানুহৰ দৃষ্টিত ধৰা নপৰে বুলি গৱেষকসকলে মন্তব্য কৰিছে৷ কেমব্ৰিজ বিশ্ববিদ্যালয়ৰ গৱেষক টম জেমছনৰ লগতে তেওঁৰ সহযোগীসকলে এই ক্ষুদ্ৰাকৃতিৰ ভেকুলীৰ প্ৰজাতি আৱিষ্কাৰ কৰিবলৈ সক্ষম হৈছে।

এনে প্ৰজাতিৰ ভেকুলী মূলতঃ দক্ষিণ মেক্সিকোৰ চিয়েৰা মাদ্ৰে ডেল চুৰ অঞ্চলত থকা ওক অৰণ্যৰ মাজত বাস কৰে। বিজ্ঞানীসকলে প্ৰজাতিটোক বিপদাপন্ন প্ৰাণীৰ তালিকাত শ্ৰেণীবদ্ধ কৰাটো প্ৰয়োজনীয় বুলি কৈছে৷

নতুন প্ৰজাতিটো চিনাক্ত কৰাৰ পিছত কেৱল মেক্সিকোতে পোৱা বুলি ধাৰণা কৰা ভেকুলী বিধৰ বৈচিত্ৰ্য বুজিবলৈ অধিক গৱেষণাৰ প্ৰয়োজন আছে বুলি গৱেষক ড০ স্মিথে কয়।

গৱেষকসকলে মেক্সিকোৰ অৰণ্যত ছয়টা এনে ক্ষুদ্ৰাকৃতিৰ নতুন ভেকুলীৰ প্ৰজাতি চিনাক্ত কৰিবলৈ সক্ষম হৈছে৷

আৰ্লিংটনৰ টেক্সাছ বিশ্ববিদ্যালয়ৰ গৱেষকৰ লগতে কেমব্ৰিজ বিশ্ববিদ্যালয় আৰু লণ্ডনৰ প্ৰাকৃতিক ইতিহাস সংগ্ৰহালয়ৰ গৱেষকসকলে সনিমিলিত ভাবে ক্ষুদ্ৰাকৃতিৰ ভেকুলী কেইটা আৱিষ্কাৰ কৰিছে।