মহিলা মঞ্চৰ আঁৰলৈ দেহ ব্যৱসায় চলাই থকা এটা চক্ৰ অৱশেষত আৰক্ষীৰ জালত পৰিল।
শেহতীয়াকৈ যোৰহাট আৰক্ষীয়ে নাগালেণ্ড আৰক্ষীৰ সহযোগত দেহ ব্যৱসায় চক্ৰ পৰিচালনা কৰি থকা পল্লৱজ্যোতি সন্দিকৈ নামৰ লোক জনৰ লগতে নাগালেণ্ডৰ মোককচাং জিলাৰ এগৰাকী মহিলাক গ্ৰেপ্তাৰ কৰাৰ পিছতে মহিলা মঞ্চৰ নাম লৈ দেহ ব্যৱসায় চক্ৰ চলাই থকা সকলৰ কথা পোহৰলৈ আহিছে।
বীৰাংগনা মহিলা মঞ্চ নামৰ সংগঠনটোৰ বেনাৰত পৰিচালিত দেহ ব্যৱসায় চক্ৰটোক যোৰহাটৰ পুলিবৰবৰ আৰক্ষী থানাৰ অন্তৰ্গত বাহতীয়া নামৰ অঞ্চলটোৰ পৰা উৎখাত কৰিবলৈ সক্ষম হৈছে আৰক্ষীয়ে।
যোৰহাটৰ উপ-আৰক্ষী অধীক্ষক বিভাস দাসে জানিবলৈ দিয়া মতে মহিলা মঞ্চৰ নামত চক্ৰটোৱে পুলিবৰ থানাৰ অন্তৰ্গত বাহতীয়াৰ উক্ত ঘৰটোত দীৰ্ঘদিন ধৰি দেহ ব্যৱসায় চলাই আহিছিল।
আৰক্ষীয়ে বাহতীয়াৰ ঘৰটোত অভিয়ান চলাই ঘৰটোত বন্দী কৰি ৰখা তিনিগৰাকী নাবালিকাক উদ্ধাৰ কৰিবলৈ সক্ষম হয়। ঘটনা সন্দৰ্ভত আৰক্ষীয়ে ৬ গৰাকী মহিলাক গ্ৰেপ্তাৰ কৰা বুলি জানিব পৰা গৈছে।
তেওঁলোকৰ বিৰুদ্ধে আৰক্ষীয়ে ভাৰতীয় দণ্ডবিধিৰ বিভিন্ন ধাৰাত ৫৫৫/২০২১ নম্বৰৰ গোচৰ ৰুজু কৰিছে।
ইতিমধ্যে অভিযুক্ত মহিলা কেইগৰাকীক আদালতে ১৪ দিনৰ ন্যায়িক জিম্মালৈ প্ৰেৰণ কৰিছে।
আৰক্ষীয়ে প্ৰকাশ কৰা মতে ঘৰটোত বন্দী কৰি ৰখা নাবালিকা তিনিগৰাকীক বিউটি পাৰ্লাৰত কাম দিয়াৰ প্ৰলোভন দি যোৰহাটলৈ অনা হৈছিল।
মহিলা মঞ্চৰ সদস্যাসকলে এনেদৰে বিভিন্ন গ্ৰাহকক ছোৱালীৰ যোগান ধৰি অহা বুলি আৰক্ষীৰ আগত প্ৰকাশ কৰিছে।
