লখিমপুৰ জিলাৰ বিহপুৰীয়াত মঙলবাৰে আবেলি সৰ্প দংশনৰ ফলত এটি ৬ বছৰীয়া শিশুৰ মৃত্যু হয়।
নিহত শিশুটিক বিহপুৰীয়াৰ খ’ৰাৰ প্ৰাঞ্জল বৰুৱাৰ একমাত্ৰ কন্যা তথা বিহপুৰীয়া দিক্ষা বিদ্যা ভৱনৰ ছাত্ৰী স্বস্তিকা বৰুৱা বুলি চিনাক্ত কৰা হৈছে।
প্ৰাপ্ত তথ্য মতে মঙলবাৰে আবেলি মাকৰ সৈতে ঘৰৰ ভিতৰত সোমাবলৈ লোৱাৰ মুহুৰ্ততে এটা বিষাক্ত সাপে শিশুটিক দংশন কৰে৷
পৰিয়ালৰ লোকে তেওঁক ততাতৈয়াকৈ বিহপুৰীয়াৰ ৩০খন বিছনাযুক্ত প্ৰাৰ্থমিক স্বাস্থ্য কেন্দ্ৰত (BPCH/CHC) ভৰ্তি কৰাই যদিও চিকিৎসকে শিশুটিক লখিমপুৰ অসামৰিক চিকিৎসালয়লৈ প্ৰেৰণ কৰে।
অৱশ্যে পৰিয়ালটোৱে শিশুটিক লখিমপুৰ অসামৰিক চিকিৎসালয়লৈ নিয়াৰ পৰিৱৰ্তে বিশ্বনাথৰ কেটেলাত থকা বৰগাং কেথলিক হাস্পতাললৈ নিয়াৰ ব্যৱস্থা কৰে। কিন্তু চিকিৎসালয় পোৱাৰ পূৰ্বেই স্বস্তিকাই মৃত্যুক সাবটি লয়।
আনহাতে বিহপুৰীয়া প্ৰাৰ্থমিক স্বাস্থ্য কেন্দ্ৰত সৰ্প দংশনৰ চিকিৎসাৰ সকলো ব্যৱস্থাই উপলব্ধ। আনকি অসম চৰকাৰৰ স্বাস্থ্য বিভাগে প্ৰকাশ কৰা বিজ্ঞাপনতো স্বাস্থ্য কেন্দ্ৰটোত উক্ত চিকিৎসা উপলব্ধ থকাৰ কথা উল্লেখ আছে।
তেনে ক্ষেত্ৰত স্বাস্থ্য কেন্দ্ৰটোৰ চিকিৎসকে শিশুটিক কোনোধৰণৰ চিকিৎসা নকৰাকৈয়ে লখিমপুৰলৈ প্ৰেৰণ কৰা কাণ্ডক অঞ্চলটোৰ লোকসকলে সহজভাৱে ল’ব পৰা নাই।
পৰিয়ালৰ লগতে স্থানীয় লোকসকলে সেয়ে এই সমগ্ৰ ঘটনাৰ এক নিৰপেক্ষ তদন্তৰ দাবী কৰিছে।
