২০২১ ৰ বিধানসভা নিৰ্বাচন সমাগত। এতিয়াৰ পৰাই প্ৰস্তুতি চলাইছে ৰাজনৈতিক দল সমূহে। বিগত ২০ টা বছৰ কংগ্ৰেছৰ দখলত থকা শিৱসাগৰ বিধানসভা সমষ্টি বিধানসভাৰ প্ৰাক্তন অধ্যক্ষ প্ৰণৱ গগৈৰ মৃত্যুৰ পিছত এতিয়া বিধায়ক শূন্য।
এক সূত্ৰৰ পৰা পোৱা তথ্য অনুসৰি এইবাৰ শিৱসাগৰ বিধানসভা সমষ্টিত যুৱ কংগ্ৰেছে দলীয় টিকট পোৱাৰ পূৰ্ণ সম্ভৱনা আছে। টিকটৰ দাবীদাৰ বহু কেইজন যুৱ কংগ্ৰেছী।
ইতিমধ্যে জনকল্যানমূলক কামৰ জরিয়তে জনসাধাৰণৰ কাষলৈ যাবলৈ আৰম্ভ কৰিছে বহুকেইজন টিকট প্ৰত্যাশীয়ে যুৱ কংগ্ৰেছীয়ে।
শিৱসাগৰ বিধানসভা সমষ্টিৰ পৰা কংগ্ৰেছ দলৰ হৈ টিকটৰ দৌৰত আছে কল্যান গগৈ, মঞ্জীৰ গগৈ, শুভ্ৰমিত্ৰ গগৈ, প্ৰশান্ত গগৈ, প্ৰমীৰ গগৈ আৰু বিদ্যুৎ গগৈ।
মঞ্জীৰ গগৈ আৰু প্ৰমীৰ গগৈ সদ্য প্ৰয়াত অসম বিধানসভাৰ প্ৰাক্তন অধ্যক্ষ প্ৰণৱ গগৈৰ পুত্ৰ।
ইপিনে প্ৰয়াত প্ৰণৱ গগৈৰ মাজু পুত্ৰ সমীৰ গগৈ বিজেপিত যোগদান কৰিব বুলি চৰ্চা লাভ কৰিছে শিৱসাগৰত। যাক লৈ এতিয়া অসন্তুষ্ট তৃণমূল কংগ্ৰেছ কৰ্মী।
কাৰণ প্ৰণৱ গগৈৰ সৱল নেতৃত্বত ২০ বছৰে শিৱসাগৰত কংগ্ৰেছ দলটোক একত্ৰিত কৰি ৰখাৰ লগতে দলৰ ভেটি মজবুত কৰি ৰাখিছিল।
আনহাতে কল্যান গগৈ আৰু প্ৰশান্ত গগৈ অসম প্ৰদেশ কংগ্ৰেছ কমিটিৰ সাধাৰণ সম্পাদকৰ দায়িত্বত আছে। দুয়োগৰাকী নেতাই বৰ্তমান বানপিড়ীত ৰাইজৰ কাষত থিয় দি প্ৰচাৰ চলাই থকা দেখা গৈছে।
দিচাংমুখ, কোঁৱৰপুৰ, ভাটি বনগাওঁ, চেৰেকাপাৰ হাঁহচৰা আদি অঞ্চলত বানপিড়ীত জনতাৰ কাষত সঘনে দেখা পোৱা গৈছে এই দুই নেতাক।
টিকটৰ দৌৰত থকা আন দুজন নেতা হ’ল শুভ্ৰমিত্ৰ গগৈ আৰু বিদ্যুৎ গগৈ। শুভমিত্ৰ গগৈ অসম প্ৰদেশ যুৱ কংগ্ৰেছৰ প্ৰাক্তন সাধাৰণ সম্পাদক।
আনহাতে বিদ্যুৎ গগৈ হ’ল শিৱসাগৰ জিলা কংগ্ৰেছৰ আইন বিভাগৰ অধ্যক্ষ।
অৱশ্যে ২০২১ নিৰ্বাচনত কংগ্ৰেছ দলৰ হৈ শিৱসাগৰ সমষ্টিৰ পৰা হাইকামাণ্ডে কোনজন প্ৰাৰ্থীক টিকট প্ৰদান কৰিব সেয়া সময়তহে জানিব পৰা যাব।
