মৰ্মান্তিক ঘটনা! আমেৰিকাত বিমান দুৰ্ঘটনাত ১১ জন স্কাইডাইভাৰসহ ১২জন নিহত
আমেৰিকাৰ মিজৌৰী প্ৰদেশত সংঘটিত হোৱা এক মৰ্মান্তিক বিমান দুৰ্ঘটনাত ১১ জন স্কাইডাইভাৰ আৰু এজন পাইলট নিহত হৈছে। ব্ৰিটিছ সংবাদ মাধ্যম বিবিচিয়ে এক প্ৰতিবেদনত এই খবৰ প্ৰকাশ কৰিছে। প্ৰতিবেদনত কোৱা হৈছে যে দেশৰ চৰকাৰী বিষয়াসকলে এই তথ্য নিশ্চিত কৰিছে।
বেটছ কাউন্টি ইমাৰ্জেন্সি মেনেজমেণ্টৰ এগৰাকী মুখপাত্ৰই জনোৱা মতে, দেওবাৰে স্থানীয় সময় অনুসৰি দিনৰ প্ৰায় ১১:২০ বজাত বিমানখনে উৰা মাৰিছিল। স্কাইডাইভিং কোম্পানী এটাই বিমানখন ভাড়াত লৈছিল।
মুখপাত্ৰগৰাকীয়ে বিবিচিক জনোৱা মতে, বিমানখনে উৰণৰ পিছত প্ৰয়োজনীয় উচ্চতালৈ উঠিব নোৱাৰিলে। ইয়াৰ পিছত হঠাতে বাওঁফালে ঘূৰি বাটলাৰ মেম’ৰিয়েল বিমানবন্দৰৰ পৰা মাত্ৰ ২০০ গজ দূৰত দুৰ্ঘটনাগ্ৰস্ত হয়। বিমানখনত থকা ১২ জন লোকৰ আটাইকেইজনৰে মৃত্যু হয়।
দেওবাৰে বিয়লি বেটছ কাউন্টিৰ শ্বেৰিফ চাড এণ্ডাৰছনে এক সংবাদমেলত কয় যে আমি এইটোক এক বৃহৎ প্ৰাণহানিৰ ঘটনা হিচাপে গণ্য কৰিছো।
শ্বেৰিফে কয় যে দুৰ্ঘটনাগ্ৰস্ত বিমানখন কোনো বাণিজ্যিক বিমান সংস্থাৰ নহয়। তেওঁ কয়, “এইখন স্থানীয় বিমান আছিল। আমাৰ স্থানীয় বিমানবন্দৰৰ পৰা উৰা মাৰিছিল।”
আমেৰিকাৰ ফেডাৰেল এভিয়েশন এডমিনিষ্ট্ৰেচনে প্ৰকাশ কৰা অনুসৰি এই বিমানখন পেচিফিক এৰ’স্পেচ পি৭৫০ মডেলৰ। বিমানবন্দৰৰ পৰা উৰা মৰাৰ সময়তে দুৰ্ঘটনাগ্ৰস্ত হয়।
এফ এ এয়ে কয় যে সেই সময়ত বিমানখনৰ বাবে কোনো এয়াৰ ট্ৰেফিক চাৰ্ভিছ আৰম্ভ হোৱা নাছিল। এজন মুখপাত্ৰই ব্যাখ্যা কৰে যে বিমানখনে যি ধৰণৰ আকাশমাৰ্গত উৰি আছিল, তাৰ বাবে নিয়ন্ত্ৰকৰ সৈতে নিয়মীয়া যোগাযোগৰ প্ৰয়োজন নাছিল।
স্থানীয় সংবাদ মাধ্যমে প্ৰকাশ কৰা অনুসৰি দুৰ্ঘটনাৰ পূৰ্বে বিমানখনৰ পৰা কোনো স্কাইডাইভাৰ জপিয়াই পৰিছিল নেকি তাৰ সন্ধানত উদ্ধাৰ কৰ্মীয়ে অঞ্চলটোত তালাচী চলাইছিল।
শ্বেৰিফে কয় যে নিহতসকলৰ একাংশ আত্মীয়ই এই মৰ্মান্তিক দুৰ্ঘটনাটো নিজ চকুৰে প্ৰত্যক্ষ কৰিছে। কৰ্তৃপক্ষই এতিয়াও প্ৰকাশ কৰা নাই নিহতসকলৰ নাম।
কানছাছ চহৰৰ পৰা প্ৰায় ৫০ মাইল দক্ষিণে অৱস্থিত মিজৌৰীৰ বাটলাৰ চহৰ। এফ এ এয়ে কয় যে ৰাষ্ট্ৰীয় পৰিবহণ সুৰক্ষা ব’ৰ্ডে এই দুৰ্ঘটনাৰ তদন্তৰ দায়িত্ব লৈছে।