চীনৰ ৰাজধানী বেইজিঙত সংঘটিত হৈছে এক চাঞ্চল্যকৰ বিমান দুৰ্ঘটনা, যিয়ে আমেৰিকাত সংঘটিত হোৱা ৯/১১ আক্ৰমণৰ ভয়ানক স্মৃতিক মনত পেলাই দিছে। চীনত নিৰ্মিত এখন সৰু বিমান চাইনা জুন নামেৰেও পৰিচিত বেইজিঙৰ আটাইতকৈ ওখ আকাশচুম্বী অট্টালিকা চিটিআইচি টাৱাৰত খুন্দা মাৰে। এই দুৰ্ঘটনাত সমগ্ৰ অঞ্চলটোত চৰম আতংক বিয়পি পৰে।
খবৰ অনুসৰি দুৰ্ঘটনাগ্ৰস্ত বিমানখন চীনৰ অন্যতম সফল লঘু বিমান এয়াৰক্ৰাফ্ট ছানৱাৰ্ড এছ এ ৬০এল অৰোৰা (বি-১২পিপি)। জানিব পৰা মতে পাইলটজনে বিমানখন অকলে উৰুৱাইছিল। দুৰ্ঘটনাৰ মাত্ৰ আধা ঘণ্টাৰ আগতে তেওঁ শিফোছি বিমানবন্দৰৰ পৰা উৰণ আৰম্ভ কৰে। বিয়লি প্ৰায় ৫:৪০ বজাত বিমানখনে বিমানবন্দৰত অৱতৰণৰ বাবে সাজু হোৱাৰ সময়তে হঠাতে নিজৰ নিৰ্দ্ধাৰিত পথৰ পৰা বিচ্যুত হয়।
ফ্লাইট ট্ৰেকিঙত দেখা গৈছে যে বিমানখনে বেইজিঙৰ ইষ্ট ফিফথ ৰিং ৰোড অঞ্চলত উপনীত হোৱাৰ পিছত বিমানখনৰ সংকেত হেৰাই গৈছে আৰু যোগাযোগ সম্পূৰ্ণৰূপে বিছিন্ন হৈছে।
ছ’চিয়েল মিডিয়াত প্ৰচাৰিত একাধিক ভিডিঅ’ত দেখা গৈছে যে ১৭০০ ফুট ওখ ১০৯ মহলীয়া অট্টালিকাটোত বিমানখনৰ টুকুৰাবোৰ আকাশৰ পৰা বৰষুণৰ দৰে সৰি পৰিছে। বিমানখনৰ খুন্দাত অট্টালিকাটোৰ কমেও দুখন খিৰিকী সম্পূৰ্ণৰূপে ভাঙি যোৱাৰ লগতে অট্টালিকাটোত এটা ডাঙৰ ফুটাৰ সৃষ্টি হয়।
বিমানখনৰ এটা উইং অট্টালিকাৰ তলত পৰি থকা দেখা গৈছে। ইয়াৰ উপৰিও তলৰ মহলাত সিঁচৰতি হৈ থকা ধ্বংসাৱশেষৰ পৰাও ক’লা ধোঁৱা ওলোৱা দেখা গৈছে।
দুৰ্ঘটনাৰ পিছতে ততাতয়াকৈ সমগ্ৰ অট্টালিকাটো খালী কৰা হয়। অৱশ্যে এই ঘটনাত কিমান লোক হতাহত হৈছে সেয়া এতিয়াও স্পষ্ট হোৱা নাই।
চাওয়াং জিলাৰ কেন্দ্ৰীয় ব্যৱসায়িক জিলাত অৱস্থিত ‘চাইনা জুন’ ভৱনটো চীনৰ ছাংহাই টাৱাৰ আৰু পিং এন ফাইনেন্স চেণ্টাৰৰ পিছতে তৃতীয় সৰ্বোচ্চ অট্টালিকা। দুৰ্ঘটনাৰ খবৰ পাই বৃহৎ আৰক্ষী বাহিনী আৰু জৰুৰীকালীন উদ্ধাৰকাৰী দল ঘটনাস্থলীত উপস্থিত হয়।
ৰয়টাৰৰ এক প্ৰতিবেদন অনুসৰি সমগ্ৰ অঞ্চলটো কটকটীয়া নিৰাপত্তাৰক্ষীয়ে ঘেৰি ধৰিছে। আৰক্ষীয়ে চিটিক টাৱাৰৰ গাতে লাগি থকা কেইবাটাও পথ বন্ধ কৰি দিছে। আনকি সাধাৰণ পথাচাৰীকো অট্টালিকাটোৰ ফটো তোলাত কঠোৰ নিষেধাজ্ঞা আৰোপ কৰা হৈছে।
বিমানখনে হঠাতে কিয় বাট হেৰুৱাই পেলালে আৰু দুৰ্ঘটনাৰ আঁৰত আন কিবা যান্ত্ৰিক ট্ৰুটি আছিল নেকি সেই সন্দৰ্ভত ইতিমধ্যে প্ৰশাসনে তদন্ত আৰম্ভ কৰিছে।
