শিৱসাগৰ প্ৰেছ ক্লাৱত আজি এক সংবাদ মেল সম্বোধন কৰে ছাত্ৰ মুক্তিৰ সভাপতি বিতু সোণোৱাল আৰু যুটীয়া সাধাৰণ সম্পাদক বিদ্যুৎ শইকীয়া, দেবব্ৰত শইকীয়া তথা কেন্দ্ৰীয় সাংগঠনিক সম্পাদকৰ পৰাশৰ কোঁৱৰে।
মেট্রিক,হায়াৰ ছেকেণ্ডাৰী পৰীক্ষাক লৈ বিশেষজ্ঞ সমিতিয়ে দিয়া মুল্যায়ন পদ্ধতিৰ বিৰোধিতা কৰি ছাত্র মুক্তিয়ে লাখ লাখ ছাত্ৰ-ছাত্ৰীৰ জীৱন ধ্বংস কৰিব পৰা সিদ্ধান্ত বাতিল কৰাৰ দাবী উত্থাপন কৰিছে।
অসম চৰকাৰৰ শিক্ষা বিভাগে মেট্ৰিক আৰু হায়াৰ ছেকেণ্ডাৰী পৰীক্ষাৰ মূল্যায়নৰ বাবে গঠন কৰি দিয়া বিশেষজ্ঞ সমিতিয়ে দিয়া আসোঁৱাহপূর্ণ সিদ্ধান্ত বাতিলৰ দাবী জনায় ছাত্র মুক্তি সংগ্রাম সমিতিয়ে।
এই আসোঁৱাহপূর্ণ সিদ্ধান্তই লাখ লাখ ছাত্ৰ-ছাত্ৰীৰ জীৱনৰ প্রতি অনিশ্চয়তা নমাই আনিব বুলি মত ব্যক্ত কৰে ছাত্র মুক্তি সংগ্রাম সমিতিয়ে।
এই সম্পৰ্কত ছাত্ৰ মুক্তিৰ নেতাত্ৰয়ে কয় যে অসম চৰকাৰ তথা শিক্ষা বিভাগে অসমৰ ৪ লাখ ৫০ হাজাৰ মেট্রিক আৰু ২ লাখ ৪২ হাজাৰ হায়াৰ ছেকেণ্ডাৰীৰ পৰীক্ষাৰ্থীৰ ভৱিষ্যত জীৱনক লৈ ল’ৰা ধেমালি কৰিছে।
ক’ভিড পৰিস্থিতিত পৰীক্ষা অনুষ্ঠিত নহয় বুলি ঘোষণা কৰা শিক্ষা বিভাগে ছাত্র-ছাত্রীসকলক কেনেদৰে মূল্যায়ন কৰি উত্তীর্ণ কৰা হ’ব তাকলৈ ১ জুলাইত বিশেষজ্ঞ সমিতিৰ পৰামৰ্শৰ ভিত্তিত শিক্ষা মন্ত্রী ডাঃ ৰণোজ পেগুৱে মেট্রিক আৰু হায়াৰ ছেকেণ্ডাৰীৰ পৰীক্ষাৰ্থীৰ বাবে ৰাজহুৱা কৰা মূল্যায়ন পদ্ধতি অনুসৰি পৰীক্ষা অনুষ্ঠিত নোহোৱাকৈ পোৱা মাৰ্কশ্বিটৰ কোনো মূল্য নাথাকিব।
যাৰ ফলত ছাত্ৰ-ছাত্ৰীসকলক এক জটিল পৰিস্থিতিৰ মাজলৈ ঠেলি দিয়া হ’ব। এবাৰ পৰীক্ষা অনুষ্ঠিত নহয় বুলি কৈ পুনৰ ভৱিষ্যতত চাকৰি পাবলৈ ছাত্র-ছাত্রীসকলে পুনৰ পৰীক্ষাত বহিব লাগিব বুলি কোৱাটো এক হঠকাৰী সিদ্ধান্তত পৰিণত হৈছে বুলি কয় ছাত্ৰ নেতাকেইগৰাকীয়ে ।
এনে বেমেজালি ধৰণৰ মূল্যাংকন পদ্ধতিয়ে এতিয়া সকলোকে বিপাঙত পেলাইছে। ইয়ে চৰকাৰখনৰ গোটেই বিষয়টোৰ প্ৰতি অমনোযোগিতাকে বুজায়।
ছাত্র-ছাত্রীৰ বৃহত্তৰ স্বাৰ্থৰ প্রতি লক্ষ্য ৰাখি এই আসোঁৱাহপূর্ণ সিদ্ধান্ত বাতিল কৰিবই লাগিব বুলি কৈ ছাত্ৰ নেতাত্ৰয়ে অন্যথা ছাত্ৰ মুক্তিয়ে প্ৰতিবাদী কাৰ্যসূচী গ্ৰহণ কৰাৰ হুংকাৰ প্ৰদান কৰিছে।
ছাত্ৰ-ছাত্ৰীসকলক মানসিক চাপ দিয়া আৰু শংকাৰ মাজলৈ ঠেলি দিয়া এই সিদ্ধান্ত চৰকাৰখনে শীঘ্ৰেই বাতিল কৰাৰ দাবী জনাইছে ছাত্ৰ মুক্তিৰ নেতাকেইগৰাকীয়ে।
ছেবা আৰু উচ্চতৰ মাধ্যমিক শিক্ষা সংসদক কঠোৰ সমালোচনা কৰে সংগঠনটোৱে।
সংবাদ মেলত সংগঠনটোৰ শীর্ষ নেতৃত্বই অতি শীঘ্ৰে ছাত্ৰ বিৰাোধী সিদ্ধান্ত বাতিল কৰি ছাত্র-ছাত্ৰীসকলক একেবাৰতে পাছ কৰাই ভৱিষ্যত সুনিশ্চিত কৰাৰ ব্যৱস্থা কৰিবলৈ চৰকাৰৰ ওচৰত দাবী উত্থাপন কৰে।
