মাৰ্ঘেৰিটা সমষ্টিৰ ভিতৰ পাৱৈ গাওঁ পঞ্চায়তৰ অন্তৰ্গত ১৯৯৪ চনত স্থাপিত সতী জয়মতী প্ৰাথমিক বিদ্যালয়খন জৰাজীৰ্ণ হৈ পৰিছে। ২০১৩ চনত প্ৰাদেশিকীকৰণ হোৱা এই বিদ্যালয়খনৰ আজিকোপতি আন্ত:গাঁথনি উন্নয়নৰ ব্যৱস্থা কৰা নহ’ল।
প্ৰায় ৭০০ ঘৰ লোকৰ বসতিপূৰ্ণ ১ নং খাগৰিপথাৰত এই বিদ্যালয়খন অৱস্থিত। ৬৮জন শিক্ষাৰ্থীৰ এই বিদ্যালয়খনত পাঁচটা শ্ৰেণীৰ শিক্ষাৰ্থীসকলক একে সময়তে কেৱল মাত্ৰ দুজন শিক্ষকে পাঠদান কৰি বিভিন্ন হাৰাশাস্তিৰ সন্মুখীন হ’ব লগীয়া হৈছে।
কিছুদিন পূৰ্বে বতাহ ধুমুহাৰ কবলত পৰি বিদ্যালখন অধিক জৰাজীৰ্ণ হৈ পৰে। বৃহস্পতিবাৰে ছাত্ৰ মুক্তি সংগ্ৰাম সমিতিৰ মাৰ্ঘেৰিটা আঞ্চলিক সমিতিৰ এটা সঁজাতি দলে বিদ্যালয়খন পৰিদৰ্শন কৰে।
সংগঠনটোৰ জিলা সভাপতি পাপু দত্তই সংবাদমাধ্যমৰ জৰিয়তে অনতিপলমে বিদ্যালয়খনৰ আন্ত:গাঁথনি উন্নত কৰাৰ লগতে জৰাজীৰ্ণ হৈ থকা বিদ্যালয়খন মেৰামতি ব্যৱস্থা গ্ৰহণ কৰিবলৈ চৰকাৰ প্ৰশাসনক দাবী জনায়।
সংগঠনটোৰ নেতৃত্বই কয় যে এই বিদ্যালয়খন প্ৰাদেশিকীকৰণ হোৱাৰ সময়ৰ শিক্ষামন্ত্ৰী বৰ্তমান মুখ্যমন্ত্ৰী হ’লগৈ কিন্তু আজিকোপতি এই বিদ্যালয়খনৰ শিক্ষাৰ্থী অনুপাতে শিক্ষক নিযুক্তি আৰু আন্ত:গাঁথনিৰ উন্নয়ন নহ’ল।
ছাত্ৰ মুক্তি সংগ্ৰাম সমিতিয়ে ৰাজ্যিক শিক্ষামন্ত্ৰী ডাঃ ৰনোজ পেগুক অতি শীঘ্ৰেই এই বিদ্যালয়খনত শিক্ষাৰ্থী, বিষয় আৰু শ্ৰেণীৰ অনুপাতে শিক্ষকৰ নিযুক্তি আৰু বিদ্যালয়খনৰ আন্তগাঁথনি উন্নয়নৰ দাবী জনায়।
অন্যথা সংগঠনটোৱে ছাত্ৰ-ছাত্ৰীৰ ভৱিষ্যতৰ কথা চিন্তা কৰি আন্দোলনৰ কাৰ্যসূচী লবলৈ বাধ্য হ’ব বুলি হুংকাৰ প্ৰদান কৰে।
