আজি মুকলি আকাশৰ তললৈ আহিল ৬ মাহে কাৰাৰুদ্ধ হৈ থকা ছাত্ৰ নেতা মানস কোঁৱৰ।
বিগত ৬ মাহে কৃষক নেতা অখিল গগৈৰ বিৰুদ্ধে চান্দমাৰী থানাত ৰুজু হোৱা ১৩/১৯ নিয়াৰ গোচৰত গ্ৰেপ্তাৰ হৈ কাৰাবন্দী হৈ আছিল কোঁৱৰ।
কালি চান্দমাৰীস্থিত NIA আদালতে ৩০ হাজাৰ টকা আমানতত কোঁৱৰৰ জামিন মঞ্জুৰ কৰে।
জামিন মঞ্জুৰ কৰিছিল যদিও কণ্টেইনমেণ্ট জ’ন আৰু কোভিড প্ৰটোক’লৰ দোহাই দি কোঁৱৰক আবদ্ধ কৰি ৰাখিছিল জেইলত।
অৱশেষত কৃষক মুক্তি আৰু ছাত্ৰ মুক্তিৰ বহু প্ৰতিবাদৰ অন্তত আজি জেইলৰ পৰা কোঁৱৰক মুকলি কৰি দিবলৈ বাধ্য হয় কাৰাগাৰ কৰ্তৃপক্ষ।
ইপিনে, জেইলৰ পৰা ওলাই আহিয়ে জেইল কৰ্তৃপক্ষৰ বিৰুদ্ধে সৰৱ হৈ পৰে মানস কোঁৱৰ।
“জেইলৰ ভিতৰৰ পৰিবেশ অত্যন্ত বেয়া। খাদ্য যি খাবলৈ দিয়ে সেয়া আমি গৰুকো নুখুৱাও। খাবলৈ দিয়া পানীৰ ৰং ৰঙা। এটা এটা কোঠাত ৫০ ৰ পৰা ৬০ জন কয়দীক ৰখা হয়।” সংবাদ মাধ্যমৰ আগত এইদৰে কয় ছাত্ৰ মুক্তিৰ কাৰ্যকৰী সভাপতি মানস কোঁৱৰে।
ইপিনে, কোঁৱৰে গুৱাহাটী কেন্দ্ৰীয় কাৰাগাৰ ক’ৰ’ণাৰ হটস্পট বুলি দাবী কৰি কয়, “পৰহি একেলগে ৫২ জন কয়দীৰ পজিটিভ আহিছে। এদিনত টেষ্ট কৰোৱা হয় প্ৰায় ৫০ জনক। যিমানৰ টেষ্ট কৰাইছে প্ৰায় সকলোৰে পজিটিভ ওলাইছে। পজিটিভ-নিগেটিভ ৰোগীক একেলগে ৰখা হৈছে।”
কা বিৰোধী আন্দোলন তীব্রতৰ ৰূপত আগুৱাই নিয়া হ’ব বুলি তেওঁ উল্লেখ কৰে।
ইপিনে, জেইলৰ পৰা ওলাই আহিয়ে “জয় আই অসম”, “কা আমি নামানো” বিজেপি চৰকাৰ গ” বেক ধ্বনিৰে উত্তাল কৰি তোলে গুৱাহাটী কেন্দ্ৰীয় কাৰাগাৰৰ সন্মুখভাগ।
এই মুহুৰ্তৰ পৰাই বিজেপিৰ সাম্প্ৰদায়িক, স্বৈৰাচাৰী আৰু ফেচিবাদী নীতিৰ বিৰুদ্ধে সংগ্ৰাম আৰম্ভ হ’ব বুলি তেওঁ হুংকাৰ দিয়ে। কা বাতিল নোহোৱা পৰ্য্যন্ত সংগ্ৰাম চলি যাব বুলিও মন্তব্য কোঁৱৰৰ।