অধিক হাৰৰ সুদৰ বিনিময়ত ঋণ দি গাঁও অঞ্চলৰ মহিলা সকলক লুণ্ঠন চলাই অহা ব্যক্তিগত খণ্ডৰ ক্ষুদ্ৰ বিত্তীয় প্ৰতিষ্ঠানৰ বিৰুদ্ধে আজি শিৱসাগৰত প্ৰতিবাদী কাৰ্য্যসূচী ৰূপায়ণ কৰে ছাত্ৰ মুক্তি সংগ্ৰাম সমিতিৰ শিৱসাগৰ জিলা সমিতিয়ে।
সংগঠনটোৰ শতাধিক সদস্যই ষ্টেশ্যন চাৰি আলিৰ পৰা সমগ্ৰ চহৰৰ মাজেৰে সমদল কৰি আহি জিলা উপায়ুক্তৰ কাৰ্য্যালয়ৰ সন্মুখত ধৰ্ণা দিয়ে।
সংগঠনটোৱে মুকলি কৰা প্ৰতিবাদী কাৰ্য্যসূচীত জিলাখনৰ বিভিন্ন প্ৰান্তৰ বহু মহিলাই অংশ লৈ ‘অসমত ক্ষুদ্ৰ বিত্তীয় প্ৰতিষ্ঠানৰ অতপালি বন্ধ কৰক’, ‘অসমৰ মহিলাক ন্যায় দিয়ক’ আদি ধ্বনিৰে পৰিবেশ উত্তাল কৰি তোলে।
আনহাতে, ক্ষুদ্ৰ বিত্তীয় প্ৰতিষ্ঠানৰ পৰা গ্ৰহণ কৰা ঋণ অত্যাধিক সুদৰ বাবে পৰিষোধ কৰিব নোৱাৰাৰ ফলত প্ৰতিষ্ঠানবোৰৰ মানসিক অত্যাচৰৰ সন্মুখিন হৈ আত্মহত্যা কৰাৰ ঘটনাও সংঘটিত হৈছে বুলি ছাত্ৰ মুক্তি সংগ্ৰাম সমিতিৰ শিৱসাগৰ জিলা সভাপতি পৰাশৰ কোঁৱৰে মন্তব্য কৰে।
কোঁৱৰে শিৱসাগৰ জিলাত এনে ক্ষুদ্ৰ ব্যক্তিগত প্ৰতিষ্ঠানৰ দপদপনি কেতিয়াও সহ্য কৰা নহ’ব বুলি সকীয়নি প্ৰদান কৰে।
প্ৰতিবাদী কাৰ্য্যসূচীৰ অন্তত সংগঠনটোৱে ক্ষুদ্ৰ বিত্তীয় প্ৰতিষ্ঠান সমূহ বন্ধ কৰা, ঋণ গ্ৰহণৰ পূৰ্বে গ্ৰাহকৰ দক্ষতা বিকাশৰ ব্যৱস্থা কৰা, ঋণ গ্ৰহণকাৰীৰ পৰা অতিৰিক্ত সুদ আদায় লোৱা বন্ধ কৰা আদি কেইবাটাও দাবী সম্বলিত এখন স্মাৰক পত্ৰ জিলা উপায়ুক্তৰ জৰিয়তে অসমৰ মুখ্য মন্ত্ৰী, বিত্ত মন্ত্ৰী, চৰকাৰৰ মুখ্য সচিৱ আৰু ৰিজাৰ্ভ বেংকৰ আঞ্চলিক প্ৰবন্ধকলৈ প্ৰেৰণ কৰে।
