চীনৰ চৰকাৰী সংবাদ মাধ্যমৰ বাতৰি অনুসৰি পূব তিব্বতত হঠাতে প্ৰবল তুষাৰপাতৰ মাউণ্ট এভাৰেষ্টৰ দূৰৱৰ্তী ঢালত প্ৰায় ১০০০ লোকক আবদ্ধ কৰি ৰখাৰ পিছত উদ্ধাৰকাৰী দলসমূহে ক্ষিপ্ৰতাৰে অভিযান আৰম্ভ কৰিছে।
শুকুৰবাৰে শেষৰ ফালে ধুমুহা আৰম্ভ হোৱাৰ পিছৰে পৰা ৪,৯০০ মিটাৰ (১৬,০০০ ফুট)তকৈও অধিক উচ্চতাৰ কেম্প ছাইটসমূহত প্ৰচণ্ড তুষাৰপাত হয়, যাৰ ফলত প্ৰৱেশ বন্ধ হৈ পৰিছে আৰু শ শ পৰ্বতাৰোহী আৰু যাত্ৰী বিপদ সংকটত পৰিছে।
কৰ্তৃপক্ষই শ শ স্থানীয় গাঁওবাসী আৰু জৰুৰীকালীন কৰ্মী নিয়োগ কৰি অৱৰুদ্ধ পথসমূহ মুকলি কৰি আৱদ্ধ ব্যক্তিক বিচাৰি উলিয়াবলৈ সক্ষম হৈছে।
স্থানীয় সূত্ৰই জনোৱা মতে, উদ্ধাৰকাৰীয়ে প্ৰায় ৩৫০ জন লোকক নিৰাপদে অঞ্চলটোৰ সৰু চহৰ কুডাংলৈ লৈ গৈছে। বতৰৰ পৰিস্থিতি সাপেক্ষে উদ্ধাৰকাৰীয়ে আনসকলক নিৰাপদ দিশলৈ পথ প্ৰদৰ্শন কৰি আহিছে।
নিজৰ দলৰ সৈতে কুডাংত উপস্থিত হ’বলৈ সক্ষম হোৱা ট্ৰেকাৰ চেন গেছুৱাঙে কয় যে, “ঠাণ্ডা আৰু সেমেকা পৰিস্থিতি অসহ্যকৰ আছিল, হাইপোথাৰ্মিয়া (শৰীৰ ঠাণ্ডা পৰি যোৱা) এক গুৰুতৰ ভাবুকি হৈ পৰিছিল। “এই অক্টোবৰৰ বতৰটো আমাৰ গাইডে আগতে দেখা বতৰৰ দৰে নহয়। ই আমাক কোনো সতৰ্কবাণী নিদিয়াকৈয়ে আঘাত কৰিলে।”
তিব্বতৰ ব্লু স্কাই ৰেচকিউ টিমে ভাঙি পৰা তম্বু আৰু ইতিমধ্যে হাইপোথাৰ্মিয়াৰ লক্ষণ দেখা পোৱা কেইবাজনো ব্যক্তিৰ পৰা বিপদৰ বাৰ্তা লাভ কৰে।
জৰুৰীকালীন কৰ্মীয়ে তৎক্ষণাত সঁহাৰি জনাই গভীৰ বৰফ আৰু সংকটপূৰ্ণ পথৰ মাজেৰে গৈ আক্ৰান্ত শিবিৰসমূহত উপনীত হয়।
এই সংকটৰ প্ৰতি সঁহাৰি জনাই টিংৰি কাউন্টি টুৰিজিম কোম্পানীয়ে জনসাধাৰণৰ সুৰক্ষা নিশ্চিত কৰাৰ বাবে শনিবাৰৰ পৰা টিকট বিক্ৰী বন্ধ কৰি এভাৰেষ্টৰ নৈসৰ্গিক দৃশ্যমালাৰ অঞ্চলত প্ৰৱেশ বন্ধ কৰি দিছে।
এই বৰফৰ ধুমুহাই অঞ্চলটোত ব্যাপক আৰু ভয়াৱহ বতৰৰ আশংকা ঘণীভূত কৰে। চুবুৰীয়া ৰাষ্ট্ৰ নেপালে ভূমিস্খলন আৰু বিধ্বংসী বানপানীৰ সৃষ্টি কৰা প্ৰচণ্ড বৰষুণৰ সৈতে যুঁজিছে, যাৰ ফলত কমেও ৪৭ জন লোকৰ প্ৰাণহানি হৈছে আৰু দলঙকে ধৰি গুৰুত্বপূৰ্ণ আন্তঃগাঁথনি ধ্বংস হৈছে।
ইফালে পূব চীনত আমফান মাটমোৱে স্থলভাগত প্ৰৱেশ কৰাৰ ফলত প্ৰায় ১ লাখ ৫০ হাজাৰ বাসিন্দাক খালী কৰিবলৈ বাধ্য হয়।
৮,৮৪৯ মিটাৰ উচ্চতাত থকা এভাৰেষ্টে শৃংগই বিশ্বৰ বিভিন্ন প্ৰান্তৰ দুঃসাহসিক অভিযানকাৰীসকলক আকৰ্ষণ কৰি আহিছে যদিও এই আৰোহণ আটাইতকৈ বিপজ্জনক হৈয়েই আছে।
শেহতীয়া বছৰবোৰত অতিমাত্ৰা ভিৰ, পৰিৱেশৰ অৱক্ষয় আৰু মাৰাত্মক দুৰ্ঘটনা আদি বিষয়সমূহে ট্ৰেকিং আৰু আৰোহনৰ গন্তব্যস্থান হিচাপে পৰ্বতটোৰ ভৱিষ্যতৰ বিষয়ে ক্ৰমাৎ উদ্বেগ সৃষ্টি কৰিছে।
