মানুহে মানুহৰ বাবে কথাষাৰ শিৰোগত কৰি টীয়কৰ চেলেংহাটৰ এগৰাকী ক্ষুদ্ৰ চাহ খেতিয়কে বৰ্তমান ক’ভিডৰ সংক্ৰমণ ৰোধৰ বাবে চৰকাৰে কন্টেইনমেন জ’ন ঘোষণা কৰা বিভিন্ন অঞ্চলত আৰ্তসকলক সাধ্য অনুসৰি সহায়ৰ হাত আগবঢ়াই মানৱতাৰ নিৰ্দশন দাঙি ধৰিছে।
টীয়কৰ বনাই ৰবি বৰুৱা গাঁৱখনত ক’ভিডে ভয়ংকৰ ৰূপ ধাৰণ কৰাৰ বাবে প্ৰশাসনে মূল পথত দাং মাৰি কন্টেইনমেন্ট জ’ন ঘোষণা কৰিছিল আজিৰ পৰা এটা সপ্তাহৰ আগতে।
অৱশ্যে গাঁৱখনৰ প্ৰায় ৫৩ টাকৈ দৰিদ্ৰ পৰিয়ালক প্ৰশাসনে খাদ্য-সামগ্ৰী যোগানো ধৰিছিল যদিও প্ৰায় ২০টাকৈ পৰিয়াল বিভিন্ন কাৰণত চৰকাৰী সাহায্যৰ পৰা বঞ্চিত হ’ব লগা হৈছিল।
কিন্তু সেই বঞ্চিত পৰিয়ালকেইটিৰ কথা অৱগত হৈ এইগৰাকী মানৱদৰদী ব্যক্তিয়ে গাঁথিৰ ধন ভাঙি উক্ত পৰিয়ালকেইটালৈ খাদ্য-সামগ্ৰী যোগান ধৰিছে।
চৌদিশে কৰ’নাৰ আতংক, সকলোৰে আৰ্থিক অৱস্থা শোচনীয়, তৎসত্তেও তুষাৰ পাল নামৰ এইগৰাকী ব্যক্তিয়ে যি আদৰ্শ দেখুৱাইছে তাক সকলোৱে ধন্যবাদ আৰু কৃতজ্ঞতা জনাই গাঁওখনৰ ৰাইজে সকলোকে তেওঁৰ আদৰ্শৰে অনুপ্ৰাণিত হ’বলৈ আহ্বান জনাইছে ।
