শিক্ষকলৈ স্কুটী দিয়াৰ আঁচনি ঘোষণা কৰি মুখ্যমন্ত্ৰী হিমন্ত বিশ্ব শৰ্মাই শিক্ষক সমাজে সন্মুখীন হোৱা সমস্যাসমূহ আঁৰ কৰাৰ লগতে শিক্ষানুষ্ঠানৰ আন্তঃগাঁথনিৰ অভাৱৰ বিষয়টো গৌণ কৰিব বিচাৰিছে। মুখ্যমন্ত্ৰীৰ এই চমক সৃষ্টিকাৰী আৰু কৌশলী ঘোষণাক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে প্ৰতিবাদ জনাইছে আৰু শিক্ষা জগতৰ মূল সমস্যাসমূহ সমাধানৰ পদক্ষেপ ল’বলৈ আহ্বান জনাইছে।
ৰাজ্যৰ প্ৰায় ৫০ হাজাৰ ঠিকাভিত্তিক শিক্ষক-কৰ্মচাৰীয়ে বেতন সুৰক্ষাসহ চাকৰি নিয়মীয়া কৰাৰ দাবী জনাই আহিছে। ২০ হাজাৰ ভেন্সাৰ শিক্ষানুষ্ঠানৰ শিক্ষক-কৰ্মচাৰীয়ে চাকৰি প্ৰাদেশিকীকৰণৰ বাবে দিশপুৰ ঘেৰাওৰ দৰে কাৰ্যসূচী লৈছে। ৭৫৯৫ গৰাকী টিউটৰে পূৰ্ণ পৰ্যায়ৰ শিক্ষকৰ মৰ্যাদাৰ বাবে আন্দোলনত নামিছে, একেদৰে ১৩২৪ জন কম্পিউটাৰ শিক্ষকে চাকৰি নিয়মীয়া কৰাৰ বাবে বাৰে বাৰে আন্দোলনত নামি চৰকাৰৰ ওচৰত দাবী উত্থাপন কৰি আহিছে। ৰাজ্যৰ বিভিন্ন প্ৰান্তৰ শিক্ষানুষ্ঠানত নিজৰ গৃহৰ পৰা আঁতৰত থাকি বহু শিক্ষকে কষ্ট আৰু মানসিক অশান্তিৰে শিক্ষাদান কৰিবলগীয়া হৈছে।
শিক্ষা বিভাগৰ এই গুৰুত্বপূৰ্ণ সমস্যাসমূহৰ কথা কৌশলেৰে লুকুৱাই ৰাখি চৰকাৰে চমক সৃষ্টিকাৰী স্কুটী দিয়াৰ কথা ঘোষণা কৰিছে। এয়া কোনোমতেই গ্ৰহণযোগ্য নহয়। আন এক উল্লেখনীয় দিশ হৈছে ৰাজ্যৰ বহু শিক্ষানুষ্ঠানত আন্তঃগাঁথনি, পুথিভঁৰাল, বিজ্ঞানাগাৰ, ডিজিটেল ক্লাছৰূম, টেলিস্কোপ আদিৰ সুবিধা নাই। স্কুটী দিয়াৰ সলনি এই প্ৰয়োজনীয় কামসমূহ কৰাৰ খুবেই প্ৰয়োজন আছিল কিন্তু চৰকাৰে এনে গুৰুত্বপূৰ্ণ কামবোৰ উপেক্ষা কৰি অপ্ৰয়োজনীয় শিতানত চৰকাৰী ধনৰ অপব্যয় কৰাত উঠিপৰি লাগিছে। প্ৰকৃততে এইখন চৰকাৰৰ শৈক্ষিক দিশৰ প্ৰতি যে কোনো গুৰুত্ব নাই সেয়া এনেবোৰ ঘোষণাই প্ৰমাণ কৰিছে।
আনহাতে আনুষ্ঠানিকভাৱে চাইকেল বিতৰণৰ কৰিবলৈ পাঠদান বন্ধ কৰি ছাত্ৰ-ছাত্ৰীক উলিয়াই অনা কাৰ্যকো ডি ৱাই এফ আইয়ে কঠোৰ ভাষাৰে নিন্দা কৰিছে। এয়া চৰকাৰৰ উদ্যোগতে চৰকাৰী শিক্ষা ব্যৱস্থা ধ্বংসৰ আখৰা চলিছে বুলি সংগঠনটোৱে অভিযোগ কৰিছে।
